ДЕНСАУЛЫҚ САҚТАУ МЕКЕМЕЛЕРІ АРАСЫНДА«1001 МАҚАЛ, 101 ЖҰМБАҚ» АТТЫ ЗИЯТКЕРЛІК БРЕЙН-РИНГ БАЙҚАУЫ ӨТТІ
2026 жылғы 28 тамызда «Трансфузиология ғылыми-өндірістік орталығы» ШЖҚ РМК ұйымдастыруымен Министрліктің 2025 жылғы 17 наурыздағы № 391 бұйрығының 28-тармағын іске асыру мақсатында денсаулық сақтау мекемелері арасында «1001 мақал, 101 жұмбақ» атты зияткерлік брейн-ринг байқауы өтті.
Байқаудың негізгі мақсаты - қатысушылардың сөздік қоры мен зияткерлік қабілетін арттыру, ата-бабамыздан қалған өшпес мұра - мақал-мәтелдер мен жұмбақтарды дәріптеу арқылы ана тіліміздің мәртебесін асқақтату, сондай-ақ медициналық ұйымдар арасындағы мекемеаралық қарым-қатынасты дамыту.
Іс-шараға денсаулық сақтау және білім беру саласының жетекші ұйымдарынан құралған «Салидат Қайырбекова атындағы Ұлттық ғылыми денсаулық сақтауды дамыту орталығы» - «Даналық дозасы», «Ұлттық балаларды оңалту орталығы» - «Оңалту қырандары», «Отан соғысының ардагерлеріне арналған орталық клиникалық госпиталь» - «Тіл жанашырлары», «Астана медицина университеті» — «Med Science»,«Ұлттық нейрохирургия орталығы»— «Ой-сана сақшылары», «Академик Н.Ж. Батпенов атындағы Ұлттық ғылыми травматология және ортопедия орталығы» ШЖҚ РМК - «Сынықшылар» 6 команда қатысты.
Зияткерлік сайыс «Таныстыру, «Ата-баба мұрасы», «Ойлан, тап», «Капитандар сайысы» және «Жүйріктен жүйрік озар...» атты кезеңнен тұрды.
Брейн-ринг барысында әр команда жоғары дайындық пен ерекше тапқырлық танытып, білімі мен жан-жақты өнерін паш етті. Іс-шараның шымылдығын ашқан таныстыру кезеңінде қатысушылар сахнаға көздің жауын алатын қазақтың ұлттық киімдерімен шықты. Әр команда өз тобын асқан шеберлікпен, мазмұнды етіп таныстыра білді. Сонымен қатар қатысушылар мақал-мәтелдердің астарлы мағынасын ашуда, логикалық жұмбақтардың шешуін жылдам табуда және капитандар сайысында ой жүйріктігін көрсетіп, көрермендер мен қазылар алқасын тәнті етті.
Медицина қызметкерлері мен сала мамандары өз кәсібінің майталманы ғана емес, сонымен бірге ұлттық құндылықтар мен ана тіліміздің нағыз жанашыры екендіктерін іс жүзінде дәлелдей білді. Тартысты әрі тартымды өткен сайыс қорытындысы бойынша жүлделі орындар келесідей бөлінді:
Бас жүлде - «Ұлттық балаларды оңалту орталығы» АҚ «Оңалту қырандары» командасына бұйырды;
І орын - «Астана медицина университеті» «Med Science» командасы;
ІІ орын - «Отан соғысының ардагерлеріне арналған орталық клиникалық госпиталь» ШЖҚ РМК «Тіл жанашырлары» командасы;
ІІІ орын - «Ұлттық нейрохирургия орталығы» «Ой-сана сақшылары» командасы.
Сонымен қатар, сайыс кезеңдерінде ерекше өнерімен көзге түскен қатысушылар мен ұжымдар арнайы аталымдармен марапатталды:
«Сөз мергені» номинациясы - «Оңалту қырандары» командасының капитаны Б. Әбішевке бұйырды;
«Үздік таныстырылым» номинациясы — «Ой-сана сақшылары» командасына берілді;
«Бірлігі жарасқан команда» номинациясымен — «Тіл жанашырлары» командасы марапатталды.
Барлық жеңімпаздар мен жүлдегерлерге арнайы дипломдар, алғыс хаттар және сыйлықтар табыс етілді.
Іс-шара тіл саясатын жүйелі іске асырумен қатар, денсаулық сақтау жүйесіндегі мекемеаралық ынтымақтастықты нығайтқан маңызды мәдени жоба болды.
