Зәкенов Сембіғали Төрешұлы

1965 жылы 11 желтоқсан күні Маңғыстау облысы Бейнеу ауданының Сарқамыс кентінде дүниеге келген. Ұлты – қазақ, білімі – мұнайшы инженер.

1991 жылы жоғары білім Министрлігінің жолдамасымен Қазақ Политехникалық институтының Ақтаудағы филиалына мұнай-газ кен орындарын игеру және пайдалану кафедрасының оқытушысы болып ұстаздық-ғылыми қызметін бастады. Осы оқу орнында қарапайым оқытушыдан университеттің профессоры дәрежесіне дейінгі мектептен өтті.

1992 жылы Қазақстан Республикасы Ұлттық ғылым академиясының механика және қолданбалы математика институтының күндізгі бөліміне аспиратураға түсіп, 1996 жылы «Сұйық, газ және плазма механикасы» мамандығы физика-математика ғылымдарының кандидаты ғылыми атағын қорғады. 1998 жылы ҚР Жоғары аттестациялық комитетінің шешімімен «Механика» мамандығы бойынша доцент ғылыми атағы берілді. 2009 жылы «Мұнай және газ кен орындарын игеру және пайдалану» мамандығы бойынша докторлық диссертацияны сәтті қорғап, 2010 жылы «Пайдалы қазбаларды игеру» мамандығы бойынша профессор атағына ие болды.

Білім беру саласындағы елеулі еңбектері үшін «Қазақстан Республикасы білім саласының құрметті қызметкері» атағы берілді, Қазақстан Республикасының ғылымына сіңірген еңбегі үшін төсбелгісімен марапатталған.

80-нен астам ғылыми және ғылыми-әдістемелік еңбектердің авторы.

Оның жетекшілігімен 3 аспирант ғылым кандидаты атағын алу үшін диссертацияларын табысты қорғады.

1996 жылдан 2007 жылға дейін Ш.Есенов атындағы университетте төмендегідей лауазымдық қызметтер атқарды:

1996-1999 жж. – университеттің аға оқытушысы, доцент;

1999 жылы – ғылыми хатшы, университет ректорының көмекшісі;

2000-2001 жж. – мұнай кенорындарын игеру кафедрасының меңгерушісі;

2001 жылы – әлеуметтік қорғау және коммерция мәселелері бойынша проректор;

2001-2007 жж. – мұнай-газ кенорындарын игеру факультетінің деканы, профессор.

2007 жылдың мамыр айынан бастап «Нұр Отан» Халықтық Демократиялық партиясы Маңғыстау облыстық филиалы төрағасының орынбасары болып қызмет атқарды.

2008-2013 жылдары Каспий мемлекеттік инжиниринг және технологиялар университетінің Теңіз технологиясы институтының директоры.

2013-2017 жылдары Каспий мемлекеттік инжиниринг және технологиялар университетінің ғылым жұмысы және қарым-қатынас бойынша проректор.

2017-2018 жылдары «КазНИПИмұнайгаз» ЖШС-і бас директордың кеңесшісі.

2018 жылдың наурыз айынан бастап Каспий мемлекеттік инжиниринг және технологиялар университетінің «Мұнайгаз ісі және геология» кафедрасының профессоры.

2018-2023 жылдар аралығы Ақтау қалалық мәслихатының хатшысы.

2023 жылдың 30 наурызынан бастап Ақтау қалалық мәслихатының төрағасы қызметін атқарып келеді.