«Заң және тәртіп» тұжырымдамасын іске асыру аясында жастардың құқықтық сауаттылығын арттыруға және қауіпсіз әрі жауапты мінез-құлық мәдениетін қалыптастыруға бағытталған Ш. Уәлиханов атындағы Қазақ университетінің студенттерімен кездесу өтті.
Кездесудің ерекшелігі оның TEDx форматында ұйымдастырылуында болды. Қауіпсіздіктің түрлі аспектілері туралы жастармен полиция департаментінің қызметкерлері – есірткі қылмысына қарсы іс-қимыл, киберқылмысқа қарсы іс-қимыл, ювеналдық және патрульдік полиция бөлімшелерінің өкілдері пікір алмасты. Әсіресе, өздерінің дербес өмірінің жаңа кезеңін бастап жатқан бірінші курс студенттеріне ерекше назар аударылды.
Кездесудің негізгі тақырыптарының бірі жастардың есірткі құқық бұзушылықтарына тартылуының алдын алу мәселесі болды. Есірткі қылмысына қарсы іс-қимыл басқармасының қызметкері әрі Аналар кеңесінің мүшесі студенттерге бұл мәселеге тек заң тұрғысынан ғана емес, өмірлік таңдау тұрғысынан қарауды ұсынды.
Кездесу басталар алдында өмірлік жағдайлары ұқсас болғанымен, әртүрлі таңдау жасаған екі жас туралы әлеуметтік бейнеролик көрсетілді. Олардың бірі адал еңбек жолын таңдаса, екіншісі «оңай табыс» туралы ұсынысқа келісіп, есірткі тасымалдаушысына айналады. Бұл оқиға алғашында елеусіз болып көрінетін шешімнің салдары қаншалықты ауыр болуы мүмкін екенін айқын көрсетті.
Әңгіме барысында дұрыс таңдау салдар орын алған кезде емес, одан әлдеқайда ертерек жасалуы тиіс екендігі атап өтілді. Атап айтқанда, күмәнді табыс көзін ұсынғанда, белгісіз затты алып кетуді немесе жеткізуді сұрағанда, банк картасын рәсімдеуді, жеке деректерді беруді немесе күмән тудыратын өзге де әрекеттерді орындауды өтінген сәтте адам дұрыс шешім қабылдай алады. Дәл сол кезде «жоқ» деп айтып, бас тартуға мүмкіндік бар.
Студенттерге күмәнді ұсыныстардан бас тартудан қорықпауға, сұрақ қоюға, ақпаратты мұқият тексеруге және дұрыс шешім қабылдауға жұмсалған бірнеше секундтың кейде бүкіл болашақ өмірге әсер етуі мүмкін екенін есте сақтауға шақырды.
Заңға бағынатын мінез-құлық заң баптарын жаттап алудан емес, сол білімді күнделікті өмірде қолдана білуден және өз таңдауы үшін жауапкершілік алудан басталады. Қауіпсіздіктің барлық бағыттарын біріктіретін негізгі қағида да – осы.
