1 қыркүйек – Білім күніне орай №3 Хромтау орта мектебінде «Мектебім – мейірім мекені» атты дәстүрлі салтанатты жиын өтті.
Мерекелік жиында мектеп табалдырығын алғаш аттаған бүлдіршіндерге ақжолтай тілектер айтылып, барша оқушыға жаңа оқу жылында сәттілік пен толағай табыс тілегі жеткізілді.
Жиында Хромтау ауданының әкімі Нұрхан Тлеумұратов сөз сөйлеп, мектеп ұжымы мен оқушыларды айтулы мерекемен құттықтады. Аудан басшысы білім беру саласындағы жетістіктерге тоқталып, өткен оқу жылының жемісті нәтижелерін атап өтті.
Биылғы оқу жылында осы білім ордасында 800-ден астам оқушы білім алады. Олардың қатарында 90-нан астам бүлдіршін бар. Биыл олар алғаш рет мектеп табалдырығын аттап, білім әлеміне қадам басты.
Жиын барысында мектептің өнерлі оқушылары ән айтып, арнау өлеңдерін оқып, мерекелік шараның сәнін келтірді.
Шара соңында жаңа оқу жылының алғашқы қоңырауы сыңғырлай соғылып, оқушылар алғашқы білім сабақтарына бет алды.
Жаңа оқу жылы барша оқушыға толағай табыс, ұстаздарға шығармашылық шабыт, ата-аналарға қуаныш әкелсін! Білім жолындағы әр қадам жарқын болашаққа бастасын!
