Тараз қаласының ХҚКО-ларында жеке менеджерді үйге шақыру қызметі қолжетімді

Тараз қаласының тұрғындары жеке менеджерді үйге шақыру сервисін пайдалана алады – «Азаматтарға арналған үкімет» мемлекеттік корпорациясының маманы көрсетілген мекенжай бойынша өтініш берушіге ыңғайлы уақытта келіп, қажетті мемлекеттік қызметтерді ресімдеуге көмектеседі.
Жеке менеджерді үйге шақыру сервисі Тараз қаласының барлық ХҚКО-ларында қолжетімді. Оны барлық ниет білдірушілер, соның ішінде кәсіпкерлер, жұмыс істейтін азаматтар, кішкентай балалары бар ата-аналар, сондай-ақ ХҚКО-ға уақытша бару қиынға соғатын адамдар пайдалана алады.
Маман үйге немесе кеңсеге барып, мемлекеттік қызметтердің барлық спектрін ұсынады. Тек төлқұжат, жеке куәлік, жүргізуші куәлігін ресімдеу және көлік құралдарын тіркеу қызметтері көрсетілмейді. Жеке менеджерді үйге шақыру сервисінің құны 7 447 теңгені құрайды.
«Азаматтардың ХҚКО-ға жеке келуге мүмкіндігі әрдайым бола бермейді – оған жұмысының тығыздығы, отбасылық жағдайы немесе басқа да себептер әсер етуі мүмкін. Сондықтан бүгінде біз ыңғайлы балама ұсынамыз: маманның өзі азаматтың мекенжайына барады. Бұл мемлекеттік қызметтерді алуды барынша қолжетімді, жылдам әрі жайлы етуге мүмкіндік береді. Біз үшін мемлекеттік корпорацияның заманауи сервистерінің азаматтардың нақты қажеттіліктеріне сай болуы маңызды», – деді «Азаматтарға арналған үкімет» мемлекеттік корпорациясының Жамбыл облысы бойынша филиалының директоры Батырхан Тоқтағұл.
Аталған сервисті пайдалану үшін мемлекеттік корпорацияның ресми сайты арқылы «Жеке менеджер» бөлімін таңдап, өтінім беру қажет. Сондай-ақ өтінімді 1414 қысқа нөмірі арқылы беруге болады. Өтініш түскеннен кейін маман өтініш берушімен байланысып, қажетті мәліметтерді нақтылайды және баруға ыңғайлы күн мен уақытты келісетін болады.