Ақтөбе облысында көлік құралдарының орташа қозғалыс жылдамдығын автоматты түрде бақылау жүйесі іске қосылды. Жаңа технология республикалық маңызы бар KAZ06 «Жайсан–Ақтөбе–Қызылорда» автожолының Үлғайсын–Қалыбай елді мекендері арасындағы жол учаскесінде жүргізушілердің тәртібін арттыруға және жол-көлік оқиғаларының алдын алуға бағытталған.
Ақтөбе облысы Полиция департаменті мен «Orsa Vision» ЖШС арасында жасалған меморандум аясында 10 тамыздан бастап аталған жол учаскесінде көлік құралдарының орташа қозғалыс жылдамдығын автоматты түрде бақылау жүйесі жұмыс істей бастады.
Жаңа жүйенің басты ерекшелігі – ол көліктің белгілі бір нүктедегі жылдамдығын ғана тіркемейді. Жүйе көлік құралының белгіленген жол учаскесін қандай уақыт аралығында жүріп өткенін анықтап, сол аралықтағы орташа қозғалыс жылдамдығын есептейді.
Яғни жүргізуші камераға жақындағанда ғана жылдамдығын төмендетіп, кейін қайтадан белгіленген шектен асыру арқылы бақылаудан жалтара алмайды. Жүйе көліктің бүкіл бақылау учаскесіндегі қозғалысын есепке алады.
Егер көлік құралы белгіленген жылдамдық режимін сақтамай, бақылаудағы учаскені рұқсат етілген орташа жылдамдықтан жоғары көрсеткішпен жүріп өтсе, құқық бұзушылық автоматты түрде тіркеледі. Одан әрі қолданыстағы заңнамаға сәйкес тиісті әкімшілік шаралар қабылданады.
Жаңа технологияның негізгі мақсаты – жүргізушілерді жазалау емес, оларды жолдың бүкіл учаскесі бойында белгіленген жылдамдық режимін сақтауға ынталандыру.
Орташа жылдамдықты бақылау жүйесі әсіресе ұзақ жол учаскелерінде маңызды. Себебі жоғары жылдамдық көлік жүргізушісінің қауіпті жағдайға әрекет ету уақытын қысқартып, жол-көлік оқиғасы болған жағдайда оның салдарын ауырлатуы мүмкін.
Цифрлық бақылау жүйесін енгізу – жол қозғалысы қауіпсіздігін қамтамасыз етуде заманауи технологияларды пайдаланудың бір бағыты. Бұл тәсіл полиция қызметкерлерінің тұрақты түрде белгілі бір нүктеде болуын талап етпей, жолдағы жылдамдық режимінің сақталуын тиімді бақылауға мүмкіндік береді.
Сонымен қатар, 10–12 тамыз аралығында республика аумағында жол қозғалысы қауіпсіздігін қамтамасыз етуге бағытталған «Қауіпсіз жол» жедел-профилактикалық іс-шарасы өткізілуде.
Ақтөбе облысы Полиция департаменті жүргізушілерді жол қозғалысы ережелерін қатаң сақтауға, белгіленген жылдамдық режимін жолдың бүкіл учаскесі бойында бұзбауға және жолда барынша мұқият болуға шақырады.
Орташа жылдамдық – тек көрсеткіш емес. Бұл жүргізушінің жолдың бүкіл учаскесінде қаншалықты қауіпсіз қозғалғанын көрсететін маңызды фактор.
Жолдағы қауіпсіздік әр жүргізушінің жауапкершілігінен басталады!
