Алматыда денсаулық сақтау нысандарын ауқымды жаңғырту жұмыстары жалғасуда. Қалада жаңа емханалар салынып, қолданыстағы ауруханалар жаңғыртылып, алғашқы медициналық-санитарлық көмек көрсету желісі кеңейтілуде.
Бұл туралы Өңірлік коммуникациялар қызметінде өткен брифингте Алматы қаласы Құрылыс басқармасының басшысы Нұрбол Нұрсағатов мәлімдеді.
Оның айтуынша, бүгінде денсаулық сақтау саласындағы 10 нысанда құрылыс-монтаж жұмыстары жүргізілуде. Оның ішінде Құрамыс, Шұғыла, Алтай-1, Ақжар шағынаудандарында және Әйтеке би көшесінде бес жаңа емхана салынуда.
– Сонымен қатар №7 қалалық клиникалық аурухананы қайта жаңғырту, №1 және №2 перзентханаларды жаңғырту, Алатау қалалық емханасын жаңарту, сондай-ақ №2 қалалық балалар клиникалық ауруханасына қосымша ғимарат салу жұмыстары жалғасуда. Алғашқы медициналық-санитарлық көмекті дамытуға ерекше көңіл бөлінуде. Осы мақсатта Саялы шағынауданында және Айбасов көшесінде ауысымына 200 адамды қабылдайтын отбасылық дәрігерлік амбулаториялар салынуда. Бұдан бөлек, №16 қалалық емханада күрделі жөндеу, қалпына келтіру және сейсмикалық күшейту жұмыстары жүргізіліп жатыр, – деді Нұрбол Нұрсағатов.
