ТҮРКІСТАН ОБЛЫСЫ БОЙЫНША МКД: КЕДЕНДІК БАҚЫЛАУ НӘТИЖЕЛЕРІ

2026 жылғы 28 шілдеде Түркістан облысы бойынша Мемлекеттік кірістер департаментінің «Қапланбек» кеден бекетінде автоматтандырылған және тасымалды радиациялық бақылау құралдары арқылы жүргізілген тексеру барысында Қазақстан Республикасынан Өзбекстан Республикасына бағыт алған Өзбекстан Республикасының азаматының жеке заттарының арасынан «Радий-226» белгілері бар радиоактивті материал анықталды.

Аталған факті бойынша материалдар процестік шешім қабылдау үшін тиісті құқық қорғау органдарына жолданды.

Сонымен қатар, Қазақстан Республикасы Энергетика министрінің 2026 жылғы 30 сәуірдегі №175-н/қ бұйрығына сәйкес мұнай өнімдерін Қазақстан Республикасының аумағынан тыс жерлерге әкетуге тыйым салынған.

Осыған байланысты, 2026 жылдың басынан бері жалпы көлемі 25,6 тонна жанар-жағармай материалдарын (дизель отыны – 16,3 тонна, бензин – 9,3 тонна) заңсыз алып өтудің 153 дерегі анықталды.

2026 жылдың өткен кезеңіндегі негізгі нәтижелер:
жалпы салмағы 131,9 грамм есірткі құралдарын заңсыз алып өтудің 27 дерегі анықталып, материалдар полиция органдарына жолданды;
жалпы сомасы 64,3 мың АҚШ доллары болатын валютаны заңсыз алып өтудің 3 дерегі анықталып, сот шешімімен ақша қаражаты тәркіленді;
декларацияланбаған 1 210 бас ұсақ малды заңсыз әкетудің 2 дерегі анықталды.

Сондай-ақ, жолаушылардың қол жүгін тексеру барысында:
шамамен 2 тонна үй жануарларының еті;
50 кг насыбай;
8 082 дана снюс;
30 литр алкоголь өнімдері;
436 дана діни кітаптар;
8 кг антикварлық бұйымдар (көне асхана құралдары) және басқа да заңсыз тасымалданған тауарлар анықталды.

Аталған барлық фактілер бойынша құқық бұзушыларға Қазақстан Республикасының қолданыстағы заңнамасына сәйкес тиісті шаралар қабылданды.

Түркістан облысы бойынша Мемлекеттік кірістер департаменті азаматтарды және еліміздің қонақтарын Қазақстан Республикасының мемлекеттік шекарасын кесіп өту кезінде қолданыстағы заңнама талаптарын қатаң сақтауға шақырады.