2026 жылғы 20–23 шілде аралығында Павлодар облысының аумағында отбасылық-тұрмыстық зорлық-зомбылықтың алдын алуға, азаматтардың құқықтарын қорғауға, отбасы құндылықтарын нығайтуға және қиын өмірлік жағдайға тап болған азаматтарға уақытылы көмек көрсетуге бағытталған «Зорлық-зомбылықсыз отбасы» облыстық профилактикалық акциясы өткізіледі.
Іс-шара барысында отбасылық-тұрмыстық зорлық-зомбылық фактілерін дер кезінде анықтауға, зардап шеккендерді қорғауды қамтамасыз етуге, кінәлі тұлғаларды Қазақстан Республикасының қолданыстағы заңнамасына сәйкес жауапкершілікке тартуға, сондай-ақ азаматтарды мемлекеттік қолдау шаралары мен қолданыстағы қорғау тетіктері туралы ақпараттандыруға ерекше назар аударылады.
Павлодар облысының Полиция департаменті тұрғындарды отбасылық-тұрмыстық зорлық-зомбылық фактілеріне бейжай қарамауға шақырады. Егер сіз құқыққа қарсы әрекеттердің куәгері болсаңыз немесе тұрмыстық зорлық-зомбылық жағдайлары туралы білсеңіз, бұл туралы дереу 102 арнасына хабарлаңыз. Уақытылы хабарлау адамның денсаулығын, қауіпсіздігін және өмірін сақтап қалуға көмектесуі мүмкін.
