Сыртқы (көрнекі) жарнаманы орналастырғаны үшін төлемақы төленеді. Егер хабарлама ұсынылмаған болса, төлемді өндіріп алу және бюджетке аудару үшін жарнаманың нақты орналастырылғаны негіз болып есептеледі.

**Төлемақы төлеушілер** – сыртқы (көрнекі) жарнама объектілерінің немесе жарнама орналастырылған ғимараттар мен құрылыстардың меншік иелері. Сонымен қатар заңды тұлға өз құрылымдық бөлімшесін дербес төлемақы төлеуші ретінде айқындауға құқылы.

**Төлемақы мөлшерлемелері** жарнама орналастырылған айдың бірінші күнінде қолданыста болған айлық есептік көрсеткіштің (АЕК) мөлшеріне еселеніп белгіленеді. Төлем сомасы бекітілген мөлшерлемелер мен жарнаманың нақты орналастырылу мерзіміне қарай айқындалады:

хабарламада көрсетілген мерзімге сәйкес;

хабарлама ұсынылмаған жағдайда – жергілікті атқарушы орган айқындаған мерзім негізінде.

Егер жарнама бір айдан аз уақытқа орналастырылса, төлемақы толық бір ай үшін есептеледі.

Төлемақы жарнама орналасқан жердегі бюджетке ай сайын, ағымдағы айдың 25-күнінен кешіктірілмей төленуге тиіс.

Қазақстан Республикасының салық заңнамасына сәйкес төлемақыны есептеу жергілікті атқарушы органдар ұсынатын мәліметтердің негізінде жүргізіледі. Аталған органдар есепті кезеңнен кейінгі айдың 15-күнінен кешіктірмей салық органдарына төлеушілер туралы, төлемақы сомасы, жарнаманың орналасқан орны мен мерзімі, сондай-ақ хабарламаның берілгені немесе берілмегені жөніндегі ақпаратты ұсынады.