Күз мезгілінде құрғақ өсімдіктер, желді ауа райы және адам факторы салдарынан табиғи өрттердің туындау қаупі сақталады. ТЖМ мүдделі мемлекеттік органдармен бірлесіп, табиғи аумақтардағы өрт қаупі жағдайын бақылау және өрттің алдын алу бағытында жүйелі жұмыс жүргізуде.
Өрт қауіпті кезең басталғалы бері бірлескен 18 468 рейд пен патрульдеу жұмысы жүргізілді. Бақылауды күшейту мақсатында жалпы саны 3 733 адамнан тұратын 659 мобильді топ құрылды. Олардың құрамына азаматтық қорғау органдарының, полицияның, табиғат қорғау және орман мекемелерінің қызметкерлері, сондай-ақ жергілікті атқарушы органдардың өкілдері кірді.
Жүргізілген іс-шаралардың қорытындысы бойынша 6 041 құқық бұзушы әкімшілік жауапкершілікке тартылды. Анықталған заңбұзушылықтардың қатарында рұқсатсыз от жағу, ауыл шаруашылығы алқаптарында құрғақ шөпті бақылаусыз өртеу, аңызақ қалдықтарын жағу және өрт қауіпсіздігі талаптарын өзге де бұзу деректері бар.
Өрт қауіпті кезең басталғалы бері ел аумағында 877 орман өрті, 43 дала өрті және құрғақ шөптің 3 190 рет жану оқиғасы тіркелді.
ТЖМ құрғақ шөптің аз ғана аумағының жануы ауқымды өртке ұласуы мүмкін екенін еске салады. Азаматтар өрт қауіпсіздігі қағидаларын сақтауы, тыйым салынған орындарда от жақпауы, құрғақ өсімдіктерді өртемеуі және ашық от көздерін қараусыз қалдырмауы тиіс.
Әлеуметтік желілерде memleket.kz-ке жазылыңыз
Қазақстанның маңызды жаңалықтары мен пайдалы материалдары — өзіңізге ыңғайлы платформада.
