СҚО полицейлері балалардың қауіпсіздігі мәселесін білім беру ұйымдарының басшыларымен талқылады

Солтүстік Қазақстан облысы полиция департаментінде кәмелетке толмағандар арасындағы қылмыстың алдын алу мәселелері бойынша жұмыс кездесуі өтті. Жиынға мектептер мен колледждердің директорлары қатысып, оған СҚО ПД бастығының бірінші орынбасары, полиция полковнигі Асылбек Құжахметов төрағалық етті. Қатысушылар оқушылардың қауіпсіздігін қамтамасыз ету, ақпарат алмасу және балалар ортасындағы проблемалық жағдайларды ерте анықтау мәселелерін талқылады. Жыл басынан бері өңірде кәмелетке толмағандар 26 қылмыс жасаған. Бұл «Заң мен тәртіп» тұжырымдамасы аясында полицейлердің, педагогтер мен ата-аналардың бірлескен бақылауын күшейту қажеттігін көрсетеді. Кездесу қорытындысы бойынша білім беру ұйымдарының басшыларына практикалық ұсынымдар берілді. Жұмысты жедел үйлестіру үшін мессенджердегі ортақ жұмыс чаты жұмысын жалғастырады. Полицейлер ата-аналарды балаларының бос уақытын бақылауға және қауіп төндіретін жағдайлар туындаған кезде полицияға 102 нөмірі арқылы дереу хабарлауға шақырады.