Тимур Екибаев: қант диабетінің ауыр асқынулары кезінде аяқты сақтап қалу жолындағы күрес

Республика күні қарсаңында Кардиология және ішкі аурулар ғылыми-зерттеу институтының Республикалық эндокринология және диабет орталығының хирург-подологы Тимур Рүстемұлы Екибаев туралы баяндаймыз.

Қант диабеті ауыр асқынуларға әкелген жағдайда пациентке ампутация қаупі төнуі мүмкін. Мұндай кезде дәрігердің басты міндеті – аурудың асқынуын тоқтатып қана қоймай, аяқты сақтап қалу, оның қызметін қалпына келтіру және адамның қалыпты өміріне оралуына көмектесу.

Тимур Екибаев өзінің кәсіби қызметін дәл осы бағытқа арнаған. Ол диабеттік табан синдромын, соның ішінде терең трофикалық ойық жараларды, диабеттік гангренаны, іріңді-некроздық зақымдануларды, сондай-ақ табан сүйектері мен буындарының бұзылуын емдеуге маманданған.

Дәрігер ұзақ уақыт бойы жазылмайтын жаралары бар пациенттерге ерекше көңіл бөледі. Мұндай пациенттер көбіне ұзақ уақыт нәтижесіз емделгеннен кейін маманның көмегіне жүгінеді. Бұл жағдайда зақымданған тіндерді алып тастау және инфекцияны бақылауда ұстаумен қатар, сау тіндерді барынша сақтай отырып, жараның жазылуына қолайлы жағдай жасау маңызды.

Оның жұмысының тағы бір маңызды бағыты – Шарконың диабеттік нейроостеоартропатиясын емдеу. Бұл – табанның сүйек-буын жүйесі бұзылып, деформациялар пайда болатын және ойық жаралардың түзілу қаупі артатын ауыр асқыну. Мұндай пациенттерді емдеуде иммобилизациялау және зақымданған аймаққа түсетін салмақты азайту әдістері қолданылады. Солардың бірі – Total Contact Cast технологиясы, яғни салмақты табанға біркелкі таратып, зақымданған тіндерді қорғауға көмектесетін арнайы жеке гипс таңғышы.

Гангрена дамып, аяқтан айырылу қаупі төнген ең күрделі жағдайларда дәрігер ағза мен тіндерді барынша сақтауға бағытталған тәсілді ұстанады. Ол тіршілікке қабілетсіз тіндерді алып тастап, инфекциялық үдерісті бақылауға алады және сау анатомиялық құрылымдарды мүмкіндігінше сақтап қалуға тырысады.

Тимур Екибаев Қазақ-Ресей медицина университетін тәмамдап, доктор Рүстем Нұралиннің подиатрия бойынша оқу курсынан өткен. Кәсіби тәжірибесін «Диабеттік табан» медициналық орталығында және Есік қаласының аудандық орталық ауруханасында жинақтаған.

Кәсіби біліктілігін одан әрі жетілдіру мақсатында Мәскеу қаласындағы Ресей Денсаулық сақтау министрлігінің Эндокринология ұлттық медициналық зерттеу орталығында тағылымдамадан өтіп, диабеттік табанды емдеу саласындағы мамандардың тәжірибесін зерделеген. Сонымен қатар испандық профессор Миньоранстың жетекшілігімен білім алып, подология мен созылмалы жараларды емдеудің заманауи тәсілдерін меңгерген.

Бүгінде оның қызметіндегі маңызды бағыттардың бірі – қант диабетінің ауыр асқынулары бар пациенттерге мамандандырылған медициналық көмекті дамыту, кешенді емдеу әдістерін енгізу және диабеттік табан синдромының алдын алу.

Әрбір сақтап қалған аяқтың артында адам тағдыры тұр. Бұл – өздігінен жүріп-тұру, еңбек ету, отбасына қамқор болу және тәуелсіздігін сақтау мүмкіндігі. Сондықтан мұндай мамандардың еңбегі айрықша маңызды. Уақтылы әрі кәсіби емдеу пациентке аурудың ауыр зардаптарынан сақтанып, өмір сапасын сақтауға көмектеседі.