Әлеуметтік желіде тараған бір ауыз сөз немесе бейнежазба санаулы секундта қалың бұқараға жетіп үлгереді. Алайда, өз пікірін ашық айту құқығы экстремистік сипаттағы контент үшін жауапкершіліктен босатпайды.
Сөз бостандығы – Ата заңмен кепілдендірілген құндылық. Бірақ бұл заңнан аттап, ойға келгенді айту дегенді білдірмейді. Семей қалалық Полиция басқармасы Экстремизмге қарсы іс-қимыл бөлімінің аға оперуәкілі Маржан Байзульдинованың айтуынша, кез келген қоғамдық араздықты қоздыруға немесе зорлық-зомбылыққа шақыруға заң жүзінде қатаң тыйым салынған.
Спикердің сөзіне сүйенсек, бүгінде өшпенділік тудыратын сөздер мен қауіпті пікірлерді «сөз бостандығы» деп ақтауға тырысатындар аз емес. Ал бұл – ел Конституциясына тікелей қайшы.
– Сөз бостандығына Конституцияның 20-бабымен кепілдік берілгенімен, ол шексіз еркіндік дегенді білдірмейді. Ой білдіру мен экстремизмнің арасында нақты шекара бар. Тұрғындар арасында діни, саяси немесе әлеуметтік алауыздық отын жағуға, заңсыз әрекеттер мен зорлық-зомбылықты ақтауға мүлдем жол берілмейді. Мұндай қадамдар қылмыстық және әкімшілік заңнама аясында жауапқа тартылады, – дейді сарапшы.
Бүгінде әлеуметтік желілер жат идеологияны таңудың басты құралына айналып отыр. Осыны ескерген құқық қорғау органдары виртуалды кеңістіктегі ақпарат ағынын тұрақты бақылауда ұстайды.
– Ақпараттың анонимді түрде әрі сәт сайын жылдам таралуы желіні экстремистік топтар үшін өте қолайлы алаңға айналдырды. Олар астыртын арбау әдістерін, тыйым салынған видеолар мен тікелей эфирлерді шебер пайдаланады. Басты нысаналары – өмірлік ұстанымы толық қалыптаса қоймаған жастар. Сондықтан ғаламторда кездесетін әрбір ақпаратқа қырағылықпен қарау маңызды, – деп түйіндеді сөзін Маржан Байзульдинова.
Материал Абай облысының ТҚК ақпараты негізінде дайындалды
