STAT.DATATHON-2026 халықаралық байқауының қорытындысы шығарылды

Биыл STAT.DATATHON – 2026 бесінші, мерейтойлық байқауы алғаш рет халықаралық форматта өтті. Байқауға Қазақстан, Әзербайжан, Беларусь, Ресей, Өзбекстан, Қырғызстан және Армениядан 108 команда тіркелді. Бұл – байқау тарихындағы ең жоғары көрсеткіш.

Байқауды ҚР СЖРА Ұлттық статистика бюросы ТМД Мемлекетаралық статистика комитетінің қолдауымен ұйымдастырды. Серіктестер – «El Umiti» корпоративтік қоры мен Alem.ai Foundation.
Халықаралық форматтағы байқау ТМД елдерінің жас мамандарын, студенттерін, зерттеушілері мен талдаушыларын біріктіріп, тәжірибе алмасуға, деректерді талдау, статистика және жасанды интеллект саласындағы заманауи құралдарды қолдануға мүмкіндік берді.

Байқау екі бағыт бойынша өтті. Data to Policy бағыты деректер негізінде шешімдер әзірлеуге, басқарушылық шешімдер қабылдауды қолдауға және әлеуметтік-экономикалық міндеттерді шешуге арналды. Ал AI for Official Statistics бағыты ресми статистиканы дамытуда жасанды интеллект пен заманауи технологияларды қолдануға бағытталды.

Қатысушылар статистикалық ақпарат негізінде жасалған синтетикалық деректер жиынтығын пайдаланып, бағдарламалау, деректерді талдау және визуализациялау құралдарын, сондай-ақ жасанды интеллект технологияларын қолданды.

Байқаудың финалдық кезеңі 20 қазанда Астана қаласындағы Alem.ai алаңында өтті. Ақтық сынға шыққан 21 команда өз жобаларын таныстырып, қорғады. Қатысушылар деректер мен заманауи технологияларды іс жүзінде қолдану мүмкіндіктерін барынша көрсетті.

Байқау қорытындысы бойынша Data to Policy және AI for Official Statistics екі тректерінің әрқайсысында үш жеңімпаз команда анықталды.

Data to Policy:
1-орын – «Star» командасы (Әзербайжан);
2-орын – «Datathink» командасы (Қазақстан);
3-орын – «СПБГУ» командасы (Ресей).

AI for Official Statistics:
1-орын – «Котлы чудес» командасы (Қазақстан);
2-орын – «Datax» командасы (Қырғызстан);
3-орын – «Sana» командасы (Қазақстан).

«Бүгінде статистика сандар мен көрсеткіштер жиынтығы ғана емес, ол халықтың өмір сүру сапасы мен ел экономикасының дамуына ықпал ететін шешімдердің негізі. Біздің міндетіміз – деректерді жинап, талдаумен шектелмей, жас мамандардың сол деректерді нақты іске жаратып, тиімді шешімдер ұсынуына мүмкіндік жасау. STAT.DATATHON байқауы жастардың білімін, жаңаша ойлау қабілетін және өзекті мәселелерді шешуде жасанды интеллектіні қолдануға дайын екенін көрсетті. Байқаудың халықаралық деңгейде өтуі де аса маңызды көрсеткіш. Ол әр елдің дарынды жастарын біріктіріп, статистика саласында тәжірибе алмасуға, жаңа идеялар мен инновациялық шешімдердің дамуына жол ашады. Байқау жеңімпаздарын жоғары нәтижелерімен құттықтаймын!» – деді Ұлттық статистика бюросының басшысы Мақсат Тұрлыбаев.

Жеңімпаздарды жоғары нәтижелерімен құттықтаймыз! Келесі жылы қайта кездескенше!