Діни сауаттылық – қорғаныс факторы

14 қазанда Сарыкөл ауданында еңбек ұжымдарымен діни сауаттылықты арттыруға және деструктивті діни ықпалдың алдын алуға арналған кездесулер өтті.
Сарыкөл тұрғындарымен психолог Базаркүл Арыстан әңгімелесті. Кездесуде теориядан гөрі күнделікті өмірде кездесуі мүмкін жағдайларға басымдық берілді: қауіпті ықпалды қалай тануға болады, неліктен жастар оған әсіресе осал болуы мүмкін және мұндай жағдайда отбасы қандай рөл атқарады?
Психолог деструктивті діни ағымдардан зардап шеккендерге көмек көрсету орталығының тәжірибесінен нақты мысалдар келтіріп, психологиялық және діни қысымға түскен адамның мінез-құлқы қалай өзгеретінін, жақындарының қандай қателіктер жіберуі мүмкін екенін және тыйым салу, айыптау мен жанжалдың неліктен жағдайды одан әрі ушықтыратынын түсіндірді. Ең бастысы – адаммен байланысты үзбей, дер кезінде кәсіби көмекке жүгіну. Орталықтың тәжірибесі деструктивті ықпалдан арылуға болатынын көрсетеді.
Әңгіме барысында интернет пен әлеуметтік желілер тақырыбына да ерекше назар аударылды. Бүгінде жастар солар арқылы орасан көлемде ақпарат, оның ішінде діни сипаттағы мәліметтер алады. Сондықтан сыни ойлау, отбасындағы сенімді қарым-қатынас және ақпарат көздерін тексере білу – алдын алудың нақты құралдары.
Кездесулер Сарыкөл ауданы әкімдігінің ішкі саясат бөлімінің тапсырысы бойынша «Қостанай облысының психологтар қауымдастығы» ҚҚ жүзеге асырып жатқан конфессияаралық және этносаралық келісімді нығайту жобасы аясында өтті.