Отбасының цифрлық картасы мемлекеттік ақпараттық жүйелердің деректері негізінде үй шаруашылықтары туралы мәліметтерді күн сайын жаңартып отырады, ал олардың әл-ауқат деңгейі ай сайын анықталады. Қазіргі уақытта жүйеде 6,2 млн отбасы есепке алынған. Бұл туралы ҚР еңбек және халықты әлеуметтік қорғау министрі Асқарбек Ертаев ОКҚ-да өткен баспасөз мәслихатында мәлімдеді.
Министрдің айтуынша, жүйе 30 мемлекеттік ақпараттық жүйеден мәлімет жинап, үй шаруашылығының әл-ауқат санатын автоматты түрде анықтайды.
«Мысалы, егер үй шаруашылығы қазан айында В санатында болса және қандай да бір әлеуметтік тәуекелдерге байланысты оның активтері нашарласа, келесі айда ол автоматты түрде С санатына ауысуы мүмкін. Мұны түсіну өте маңызды. Санат мәңгілікке берілмейді. Жүйе әрдайым автоматты режимде жаңартылып, әрбір үй шаруашылығы бойынша өзекті мәліметтерді ұсынады», – деп түсіндірді министр.
Министр жұмыссыз азаматтарды жұмыспен қамту мәселелерін қоса алғанда, әлеуметтік қолдау жүйесіндегі өзгерістерге де тоқталды.
Қазір жұмыссыздық бойынша жәрдемақы алты ай бойы төленеді, ал жұмыс іздеуші ретінде тіркелу мерзімі үш күнді құрайды. Министрдің айтуынша, бұл нормалар пандемия кезінде енгізілген. Пандемияға дейін жәрдемақы төрт ай бойы төленіп, жұмыс іздеуші ретінде тіркелу мерзімі 10 күн болған. Енді Еңбек министрлігі бұрынғы тәсілге қайта оралуды жоспарлап отыр, бірақ өзгерістер енгізіледі: жәрдемақы үш ай бойы төленеді, ал тіркелу мерзімі 14 күнге дейін ұзартылады.
«Азаматтың тұрақты жұмысқа тезірек оралуын қамтамасыз ету қажет. Бұл - жұмысқа орналастыруға көмектесу, тегін оқыту, субсидияланатын жұмыс орындары арқылы жұмыспен қамту. Жәрдемақы төлеудің орнына дағдылар мен құзыреттерді дамытуға және жұмысқа орналастыруға басымдық берілуі керек. Бұл - келесі жылдан бастап енгізілетін басым бағыт», – деді министр.
Асқарбек Ертаев зейнетақы жинақтарының сақталуына қатысты кепілдіктердегі өзгерістерді де түсіндірді. Оның айтуынша, азаматтардың шоттарындағы зейнетақы жинақтарына мемлекет кепілдік береді және бұл норма Әлеуметтік кодексте бекітілген. Ал өзгерістер жинақтардың өзіне емес, инвестициялық табысқа қатысты.
Министрдің түсіндіруінше, азаматтар өздерінің зейнетақы жинақтарын жеке басқарушы компаниялардың басқаруына бере алады. Осыған байланысты инвестициялық табысқа қатысты республикалық бюджеттен өтемақы төлеу енді көзделмейді. Жеке басқарушы компанияны таңдаған кезде азамат зейнетақы жинақтарын оған беру туралы шешімді өзі қабылдайды. Қаражатты басқару шарттары мен ықтимал инвестициялық табыс туралы таңдалған компаниядан немесе Бірыңғай жинақтаушы зейнетақы қорынан (БЖЗҚ) нақтылау қажет.
