Халық алғысы – полиция қызметіне берілген жоғары баға: елорда тұрғыны учаскелік полиция инспекторына ризашылығын білдірді

Астана қаласының Полиция департаментіне Нұра ауданының учаскелік полиция инспекторы Расул Бекназардың қызметіне ризашылығын білдірген тұрғыннан алғыс хат келіп түсті.
Тұрғын өз хатында полиция қызметкерінің кәсібилігін, жауапкершілігін және азаматтарға деген құрметін ерекше атап өткен. Оның айтуынша, учаскелік инспектор әрбір өтінішке мұқият қарап, тұрғындардың мәселелерін тыңдап, оларды шешуге барынша көмек көрсетуге тырысады.
«Жауапкершілігі жоғары, адал әрі жанашыр қызметкер азаматтарға құрметпен қарап, әрбір өтінішке мұқият қарайды. Осындай полиция қызметкерлері халықтың сенімі мен құрметіне ие болып, тұрғындардың тыныштығы мен қауіпсіздігін қамтамасыз етеді», – деп жазған алғыс білдіруші.
Расул Қайратұлы Нұра аудандық Полиция басқармасының № 50 учаскесінде учаскелік полиция инспекторы болып қызмет атқарады.
Учаскелік инспектордың жұмысы – тек құқық бұзушылықтың алдын алу мен қоғамдық тәртіпті қамтамасыз ету ғана емес. Бұл – тұрғындардың сеніміне ие болу, олардың мәселелеріне бейжай қарамау және қиын жағдайда қолдау көрсету.
Халықтың алғысы – полицей еңбегінің ең маңызды бағаларының бірі. Осындай жылы лебіздер азаматтар мен полиция арасындағы сенімді нығайтып, қызметтік міндетін адал атқарып жүрген қызметкерлердің еңбегіне берілген лайықты баға болып табылады.