Өнеркәсіптік қауіпсіздікті қамтамасыз етудегі ғылыми тәсілдер мен жаңа стандарттар

«KAZENERGY» қауымдастығының алаңында өнеркәсіптік қауіпсіздік саласын жетілдіруге арналған жұмыс тобының кезекті отырысы өтті. Маңызды жиынға Қазақстан Республикасы Төтенше жағдайлар министрлігі Өнеркәсіптік қауіпсіздік комитетінің басқарма басшысы Ахан Телманов қатысып, өндірістік қауіпсіздік стандарттарын заман талабына сай бейімдеу мәселелерін талқылады. Іс-шара аясында өндірістік салаларды нормативтік-құқықтық реттеу сапасын арттыру және тәуекел факторларын ескере отырып, техникалық куәландыру тетіктерін енгізу жайы жан-жақты қарастырылды. Кездесуде бұған дейін қабылданған хаттамалық тапсырмалар мен бекітілген іс-шаралар жоспарының орындалу барысы сараланып, салалық дамудың ағымдағы динамикасына баға берілді.
Аталған жиында Назарбаев Университетінің ғалымдары әзірлеген ғылыми-зерттеу жұмысының кешенді есебі мен негізгі қорытындылары таныстырылды. Зерттеу нәтижелері өндірістік нысандардағы қауіп-қатерді алдын ала анықтау және техникалық тексерулердің тиімділігін арттыру жолдарын ғылыми тұрғыдан негіздеуге мүмкіндік береді. Сонымен бірге жиынға қатысушылар отандық кәсіпорындардың тәуекелдерге негізделген бақылау тетіктерін енгізуге дайындық деңгейін және осы процестің қалыптасу көрсеткіштерін бағалау құралдарын талқылады. Шара барысында арнайы бақылауға алынатын немесе осы тәртіпке ұсынылатын өндірістік жабдықтар мен құбыржолдар тізбесіне қатысты сараптамалық құжаттар мен материалдар мұқият қаралып, тиісті шешімдер қабылданды.