Түркістан облысы Төтенше жағдайлар департаментінің Өнеркәсіптік қауіпсіздік басқармасы «Жылыту қазандықтарын пайдалану кезіндегі өнеркәсіптік қауіпсіздік» тақырыбында дөңгелек үстел өткізді.
Жиын барысында жылыту маусымының басталуына байланысты жылу өндіретін құрылғылар мен олардың инженерлік жүйелерін талапқа сай әрі қауіпсіз жұмыс режимінде ұстау мәселелері кеңінен қаралды. Шараға қатысушыларға белгіленген қауіпсіздік ережелерін сақтамаудың арты өрт, жарылыс, көмірқышқыл газымен улану, технологиялық жабдықтардың істен шығуы және адамдардың денсаулығы мен өміріне зиян келу сияқты ауыр салдарға әкеп соқтыратыны түсіндірілді.
Сонымен қатар, облыс аумағында орналасқан қауіпті өндірістік объектілерде өнеркәсіптік қауіпсіздікті тиісті деңгейде қамтамасыз ету, қауіпті факторлардың теріс әсерін жою және апаттық жағдайлардың алдын алу мен болдырмау бойынша алдын ала кешенді шараларды күшейту тапсырылды.
