Қарағанды облысында балалар футболының жүйесі дамып келеді. Алғашқы жаттығулардан бастап жарыстарға қатысуға және кәсіби клуб академиясында дайындалуға дейінгі кезеңдерді қамтитын бұл жүйе жас спортшылардың қабілетін шыңдауға бағытталған. ALGA! жобасы қазірдің өзінде 40 мектепті қамтыса, Freedom BFL балалар лигасы жас футболшыларға алаңға тұрақты шығып, жарыс тәжірибесін жинақтауға мүмкіндік береді.
Қарағанды облыстық футбол қауымдастығы (QOFA) ALGA! мектеп жобасын 2025 жылы іске қосты. Алғашқы жылдың өзінде жобаға қатысушылар саны 10 мектептен 40 мектепке дейін өсті. Олардың қатарында облыстың шалғай аудандарындағы білім беру ұйымдары да бар.
Енді балалар спорт секцияларына баруға уақыт жұмсамай-ақ, өз мектебінде футболмен айналыса алады. Білім беру ұйымдары қажетті құрал-жабдықтармен қамтамасыз етіліп, дене шынықтыру пәнінің мұғалімдері UEFA D бағдарламасы бойынша даярлықтан өтеді.
QOFA президенті Тимур Турловтың айтуынша, жобаның басты мақсаты – болашақ кәсіби футболшыларды анықтау ғана емес, сонымен қатар спортты балалар үшін қолжетімді ету.
– ALGA! жобасының негізгі мәні – балалардың денсаулығына, командалық жұмыс дағдыларына және белсенді өмір салтына деген дағдысын қалыптастыруға салынған инвестиция. Мектеп қабырғасында мұндай мүмкіндікке ие болатын балалардың саны неғұрлым көп болса, бұқаралық футбол да, өңірдің спорт мәдениеті де соғұрлым дами түседі, – деді Тимур Турлов.
Келесі кезең – жас футболшыларға ойын тәжірибесін жинақтап, жарыстарға тұрақты қатысуға мүмкіндік беретін Freedom BFL балалар лигасы. Қысқы маусымда лигада 159 команда, яғни шамамен 2700 бала өнер көрсетті. Жазғы маусымға 107 команда қатысып, футболшылар саны 1900-ден асты.
Лига аясында жарыс тәжірибесін қалыптастырумен қатар, матчтарды ұйымдастыру ісіне де ерекше көңіл бөлінеді. Төрешілік жүйесі жетілдіріліп, ойындар тікелей эфирде көрсетіледі, AI-камералар қолданылады және медиасүйемелдеу қамтамасыз етіледі. Дайындық үдерісі «жаттығу – ойын – қалпына келу» қағидаты бойынша ұйымдастырылған.
– Біз матчтарды ұйымдастыру, төрешілік, трансляциялар, AI-камералар, медиасүйемелдеу және марапаттау рәсімдері сияқты бағыттар бойынша жарыстардың деңгейін кезең-кезеңімен көтеріп келеміз. Біздің мақсатымыз – жарыстарды барынша қолжетімді етіп, балаларға да, ата-аналарға да қолайлы жағдай жасау, – деп атап өтті QOFA президенті.
Ал дайындығы жоғары ойыншылар үшін келесі қадам кәсіби клубтың академиясына түсу болуы мүмкін. Қарағандылық «Шахтер» командасының жасөспірімдер құрамалары Freedom QJ League лигасында төртінші жыл қатарынан өнер көрсетіп, жарыс көшбасшыларының қатарынан көрініп келеді.
Қарағанды облыстық футбол қауымдастығының ақпараты бойынша
