Шығыс Қазақстан облысындағы 20 мектепте 25 полиция сыныбы бар, онда 418 оқушы білім алады. Осы арнайы сыныптың 50-ден астам өкілі Өскеменде өткен, спорттық жарыстарды, шығармашылық байқаулар мен патриоттық іс-шараларды біріктірген "Жас сақшы" облыстық форумына жиналды.
Форум қызметтік борышын атқару кезінде қаза тапқан ішкі істер органдарының қызметкерлеріне арналған ескерткішке гүл шоқтарын қоюдан басталды. Қатысушылар батырлардың рухын бір минут үнсіздікпен еске алды.
Шараны ашқан ШҚО полиция департаменті бастығының бірінші орынбасары Болат Нұрсейітов жас буынды тәрбиелеуде полиция сыныптарының маңызын атап өтті.
— Ар-ождан, борыш, әділдік және ерлік — бұл тұлғаны қалыптастыратын және “Заң мен тәртіп” қағидатының негізінде жатқан құндылықтар. Заңды құрметтеу — басқа адамдардың құқықтарын қорғау, тәртіпті сақтау және өз әрекеттерің үшін жауап беру дегенді білдіреді, — деп атап өтті Болат Нұрсейітов.
Сондай-ақ іс-шараға Ұлттық ұлан Ардагерлер кеңесінің төрағасы Нұрлыбек Үдербаев қатысып, жастарды патриоттық рухта тәрбиелеу мен ұрпақтар сабақтастығының маңыздылығына тоқталды.
Оқушылар арнайы мақсаттағы бөлімшелер сарбаздарының өнерлерін тамашалап, арнайы техникамен, кинологиялық қызметтің жұмысымен және робототехника мүмкіндіктерімен танысты. Сонымен қатар олар жедел басқару орталығы мен полиция департаментінің музейінде болып, өңірдің ішкі істер органдарының тарихынан хабардар болды.
Бағдарламаның спорттық бөлігі полиция сыныптарының оқушылары арасындағы футбол жарысынан тұрды.
Шығармашылық байқауларда командалар бейневизиткаларын, "Полицияның болашағы" тақырыбындағы театрландырылған қойылымдар мен патриоттық әндерді ұсынды. Сондай-ақ полиция департаментінің хоры өз өнерлерін көрсетті.
Байқаулар мен спорттық жарыстардың қорытындысы бойынша үздік командалар мен қатысушылар кубоктармен, грамоталармен және бағалы сыйлықтармен марапатталды.
Басты нәтиже тек спорттық және шығармашылық жетістіктер ғана емес, сонымен қатар бірлік, өзара қолдау және жаңа жеңістерге ұмтылу атмосферасы болды.
ШҚО ПД қызмткерлері жастармен жұмыс істеу, спорттық бастамаларды дамыту және заңды құрметтеуге тәрбиелеу профилактикалық қызметтің маңызды бағыттары болып қала беретінін атап өтеді.
