Сыбайлас жемқорлыққа қарсы іс-қимыл - мемлекеттің тұрақты дамуын қамтамасыз ететін, қоғамдағы әділдік пен заң үстемдігін нығайтатын маңызды міндеттердің бірі. Бұл мәселе тек мемлекеттік органдардың жұмысымен шектелмейді. Ол әрбір азаматтың жауапкершілігіне, қоғамның құқықтық мәдениетіне және ортақ құндылықтарымызға тікелей байланысты.
Бүгінде елімізде ашықтық, әділдік және заң үстемдігі қағидаттарына негізделген мемлекеттік басқару жүйесін қалыптастыруға ерекше көңіл бөлінуде. Өйткені мемлекеттің ең басты байлығы - халықтың сенімі. Ал сол сенімді сақтау мен нығайту мемлекеттік қызметте жүрген әрбір азаматтың кәсіби ғана емес, адамгершілік борышы болуы тиіс.
Сыбайлас жемқорлық - қоғамның дамуын тежейтін, азаматтардың мемлекеттік институттарға деген сеніміне нұқсан келтіретін келеңсіз құбылыс. Оның салдары экономикалық көрсеткіштермен ғана өлшенбейді. Ең алдымен, ол әділеттілік қағидаттарына қайшы келіп, азаматтардың заң алдындағы теңдігіне күмән туғызады. Сондықтан жемқорлықтың салдарымен күресуден бұрын, оның туындауына жол бермейтін жағдай қалыптастыру аса маңызды.
Мемлекет басшысы Қасым-Жомарт Тоқаевтың ұстанымында заң мен тәртіп, азаматтардың құқықтарын қорғау және мемлекеттік басқарудың ашықтығы маңызды орын алады. Бұл қағидаттарды күнделікті қызметте басшылыққа алу - барлық деңгейдегі мемлекеттік органдарға ортақ талап.
Осы орайда, жергілікті атқарушы органдардың жауапкершілігі ерекше. Себебі тұрғындар мемлекеттік биліктің жұмысын ең алдымен өздері күнделікті жүгінетін мекемелердің қызметі арқылы бағалайды. Жер қатынастары, тұрғын үй, әлеуметтік қолдау, кәсіпкерлік және басқа да маңызды салаларда қабылданатын әрбір шешім заң талаптарына сай, ашық әрі түсінікті болуы қажет.
Бесқарағай ауданында да халықпен ашық диалог орнату, тұрғындардың өтініштері мен ұсыныстарына уақтылы жауап беру, мемлекеттік қызметтердің қолжетімділігін қамтамасыз ету - жергілікті атқарушы билік жұмысының маңызды бағыттары.
Біздің басты ұстанымымыз - мемлекеттік қызмет халыққа қызмет етудің жауапты міндеті екенін әрдайым есте сақтау. Әрбір мемлекеттік қызметші өзіне жүктелген міндетті адал атқарып, қабылдаған шешімінің заңдылығы мен әділдігіне жауап бере білуі тиіс.
Сыбайлас жемқорлықтың алдын алудың тиімді тетіктерінің бірі - мемлекеттік қызметтерді цифрландыру және шешім қабылдау процестерінің ашықтығын арттыру. Бұл тұрғындар үшін қолайлы жағдай жасап қана қоймай, артық әкімшілік кедергілерді азайтуға, жемқорлық тәуекелдерін төмендетуге мүмкіндік береді.
Дегенмен, заңнамалық талаптар мен бақылау тетіктері қаншалықты жетілдірілгенімен, адамның ішкі мәдениеті мен азаматтық жауапкершілігі жоғары болмаса, бұл мәселені түбегейлі шешу қиын. Адалдық, әділдік, ар-ождан және жауапкершілік ұғымдары әрбір азаматтың өмірлік қағидатына айналуы қажет.
Әсіресе өскелең ұрпақтың бойында жемқорлыққа төзбеушілік мәдениетін қалыптастыру маңызды. Жастар адал еңбек пен білімнің, табандылық пен жауапкершіліктің арқасында жетістікке жетуге болатынын түсініп өсуі тиіс. Бұл бағытта отбасының, білім беру ұйымдарының, қоғамдық институттар мен бұқаралық ақпарат құралдарының атқаратын рөлі зор.
Сонымен қатар, сыбайлас жемқорлыққа қарсы іс-қимылда қоғамның белсенділігі айрықша маңызға ие. Азаматтардың заңсыздыққа бейжай қарамауы, өз құқықтарын білуі, мемлекеттік органдардың қызметіне қоғамдық бақылаудың күшеюі - ашық әрі әділетті қоғам қалыптастырудың маңызды алғышарттары.
Біз үшін ең маңыздысы - аудан тұрғындарының мемлекеттік билікке деген сенімін нығайту. Бұл сенім құрғақ уәдемен емес, нақты жұмыспен, әділ шешіммен және халық алдындағы жауапкершілікпен қалыптасады.
Сыбайлас жемқорлыққа қарсы күрес бір реттік науқан немесе белгілі бір кезеңмен шектелетін жұмыс болмауы тиіс. Ол күнделікті қызметтің ажырамас бөлігіне, қоғамның берік ұстанымына айналуы қажет.
Адал қызмет - абыройлы мемлекеттің негізі. Әділдік үстемдік құрған жерде халықтың сенімі артып, елдің дамуына берік жол ашылады.
Сондықтан сыбайлас жемқорлықтың алдын алу ісіне әрқайсымыз жауапкершілікпен қарап, заң мен тәртіпті құрметтеуді, адалдық пен әділдікті басты құндылығымызға айналдыруымыз керек.
Өйткені жемқорлықсыз қоғам құру - баршамызға ортақ мақсат, ал сол мақсатқа жету - әрқайсымыздың азаматтық міндетіміз.
Ділдар Қалиқан,
Бесқарағай ауданының әкім
