Қоғамдағы тыныштық пен адамдардың қауіпсіздігі – күн сайын көзге көрінбейтін, бірақ аса маңызды еңбектің нәтижесі. Сол жауапкершілікті арқалап жүрген мамандардың бірі – учаскелік полиция инспекторы.
Абай облысы Полиция департаменті Әуезов полиция бөлімі Қоғамдық қауіпсіздік бөлімінің аға учаскелік полиция инспекторы полиция майоры Дамир Ғабдоллұлы Құдайбергенов ішкі істер органдарында 2011 жылдан бері қызмет атқарып келеді. Ал учаскелік инспектор лауазымындағы еңбек жолы 2015 жылдан басталған.
Оның жұмыс күні таңғы жоспардан ғана емес, тұрғындармен кездесуден басталады. Бірі мәселесін айтып келеді, бірі кеңес сұрайды, енді бірі өз аумағындағы жағдайға алаңдайды. Әр азаматтың мәселесі әртүрлі болғанымен, олардың барлығын біріктіретін бір нәрсе бар – қауіпсіздікке деген қажеттілік.
Учаскелік инспектордың жұмысы тек құқық бұзушылық орын алған кезде әрекет етумен шектелмейді. Аумақты аралау, тұрғындармен сөйлесу, профилактикалық есептегі азаматтармен жұмыс жүргізу, отбасылық-тұрмыстық жанжалдардың алдын алу – оның күнделікті қызметінің бір бөлігі.
Бұл қызметте заңды жақсы білу жеткіліксіз. Адамды тыңдай білу, жағдайды түсіну, сабыр сақтап, дер кезінде дұрыс шешім қабылдау да маңызды.
«Кейде адамға ең алдымен оны тыңдайтын адамның өзі керек. Әрбір өтініштің артында нақты адамның тағдыры, отбасы немесе алаңдаушылығы тұрады. Сондықтан кез келген мәселеге жауапкершілікпен қарауға тырысамыз», – дейді полиция майоры.
Учаскелік инспектордың еңбегі көп жағдайда көзге көрінбейді. Бірақ дер кезінде жүргізілген профилактикалық жұмыс, алдын алынған құқық бұзушылық немесе қиын жағдайға тап болған азаматқа көрсетілген көмек – қызметтің басты нәтижесі.
Бір қарағанда, бұл – кезекті жұмыс күні. Ал шын мәнінде, оның әр сәтінде біреудің тыныштығы, бір отбасының қауіпсіздігі, бір азаматтың сенімі тұр.
Өйткені учаскелік полиция инспекторы үшін қызметтің басты мәні – тек тәртіпті сақтау емес, адамдардың өзін қауіпсіз сезінуіне жағдай жасау. Ал халықтың сенімі – осы жауапты еңбектің ең үлкен бағасы.
