Алматыда Lincoln Company компаниясы TKS Disputes-пен бірлесіп ұйымдастырған 16-шы жыл сайынғы Орталық Азия заң форумы өтті. Шараға заң қоғамдастығының, бизнес өкілдері, инвестициялық компаниялар мен сараптамалық ұйымдардың 500-ден астам өкілі қатысты.
Форум кәсіби тәжірибе алмасу және инвесторлардың құқығын қорғау, бизнесті сүйемелдеу және дауларды шешуді қоса алғанда, заң практикасының өзекті мәселелерін талқылау алаңына айналды.
Инвесторлардың құқықтарын қорғау комитеті төрағасының орынбасары Азамат Дүйсембеков форум қатысушыларына Комитеттің қызметі және инвесторлардың құқығын қорғаудың жаңа тетіктері туралы баяндады.
Ол бизнес жүргізу шарттарының болжамдылығы мен мемлекеттік органдар шешімдерінің заңдылығына ерекше тоқталды. Азамат Дүйсембековтің айтуынша, инвестор үшін капитал салу мүмкіндіктері ғана емес, жобаны іске асырудың барлық кезеңінде өз құқықтарының қорғалатынына деген сенім де маңызды.
«Қазақстанға келген инвестор өзінің жобасына тек қолдау көрсетіліп қана қоймай, оны іске асырудың барлық кезеңінде қорғалатынын түсінуі біз үшін аса маңызды. Комитет жұмысының негізгі бағдарлары – заңдылық, жеделдік және түпкілікті нәтиже», – деді Азамат Дүйсембеков.
Комитет төрағасының орынбасары компаниялардың қызметін сүйемелдейтін және инвестициялық жобаларды іске асыру барысында туындайтын құқықтық мәселелермен тікелей жұмыс істейтін заң қоғамдастығымен ашық диалогтың маңыздылығын да атап өтті.
Комитеттің мұндай кәсіби іс-шараларға қатысуы бизнестен және заң қоғамдастығынан кері байланыс алуға, инвесторлардың құқығын қорғаудың қолданыстағы тетіктерін түсіндіруге және тәжірибе барысында туындайтын мәселелерді талқылауға мүмкіндік береді.
