Қазақстан Республикасының Денсаулық сақтау министрлігінің Санитариялық-эпидемиологиялық бақылау комитеті·Жаңалықтар мұрағаты
Астанада Қазақстан мен АҚШ арасындағы ынтымақтастық аясында өткізілген ядролық төтенше жағдайларға ден қою жөніндегі үш күндік семинар өз жұмысын аяқтады.
Іс-шараға ядролық және радиациялық қауіпсіздікті қамтамасыз етуге тартылған Қазақстанның мемлекеттік органдары мен ұйымдарының өкілдері, сондай-ақ америкалық сарапшылар қатысты. Негізгі назар радиациялық авариялар кезіндегі ведомствоаралық өзара іс-қимылды жетілдіруге, жауапты құрылымдардың рөлдері мен міндеттерін нақтылауға және практикалық тәжірибе алмасуға аударылды.
Семинардың жеке бір бөлігі радиациялық авария кезінде халықтың санитариялық-эпидемиологиялық саламаттылығын қамтамасыз ету мәселелеріне арналды. Қатысушылар денсаулық сақтау жүйесінің дайындығын, жауапты мемлекеттік органдардың өзара іс-қимылын және халықты қорғау жөніндегі іс-шараларды ұйымдастыру мәселелерін қарастырды.
Іс-шараның маңызды бөлігі авариялық жағдайлардың даму сценарийлері негізінде өткізілген практикалық талқылаулар болды. Қатысушылар сценарийдің жеті кезеңін дәйекті түрде қарастырып, әртүрлі құрылымдардың іс-қимылдарын талдады және төтенше жағдайлар кезінде ден қою тәсілдерін талқылады.
Америкалық тарап атом электр станцияларының алаңдарында және одан тыс жерлерде кешенді оқу-жаттығулар өткізу тәсілдерін таныстырды. Сондай-ақ ядролық және радиациялық аварияларға дайындық, нормативтік талаптар және халықаралық ынтымақтастық, оның ішінде АҚШ-тың Атом энергиясы жөніндегі халықаралық агенттікпен (МАГАТЭ) өзара іс-қимылы мәселелері қаралды.
Іс-шара қорытындысы бойынша қатысушылар тәжірибе алмасып, ядролық және радиациялық төтенше жағдайларға дайындық пен ден қою жүйесін одан әрі жетілдіру жөніндегі қадамдарды талқылады.
