ҚР ТЖМ зейнеткері Әбілқайыр Насырұлы Иманбеков Қазақстанда облыстық және республикалық жарыстарға қатысу үшін скандинавиялық жүрістен құрама команда ашуға бастамашы болды. 79 жастағы зейнеткердің өзі Алматыда, Түркістанда, Самарқанда, Бішкекте, Семейде, Ыстықкөлде өткен марафондарға қатысып, жыл сайын скандинавиялық жүріс фестивалінде өнер көрсетіп келеді.
Ал былтыр Италияда өткен скандинавиялық жүрістен Әлем кубогында ол екінші орын алып, үздік нәтиже көрсетті.
«Мен скандинавиялық жүріске назар аудардым. Өскеменде осы дене белсенділігімен айналысатын адамдар тобына қосылдым. Бұл – үнемі қозғалыста болуға мүмкіндік беретін көпшілікке қолжетімді спорт түрі», – деді Әбілқайыр Иманбеков.
Әбілқайыр Иманбеков үнемі жаттығып, ниет білдірушілерді спорттың осы қызықты түрін меңгеруге шақырады.
Сонымен қатар зейнеткердің тағы бір хоббиі бар – би билеу. Әсіресе Әбілқайыр Насырұлы вальсті ұнатады. Бұл бағытта да ол жетістікке жетіп, Алматыда өткен халықаралық байқауға қатысып, лауреат атанды.
– Әбілқайыр Насырұлы Иманбеков 42 жылын төтенше жағдайлар қызметіне арнады. 14 жыл бойы облыстық азаматтық қорғаныс штабында Азаматтық қорғаныс курстарының бастығы болды. Көп жылдар бойы Өскемен қаласының төтенше жағдайлар басқармасын басқарып, азаматтардың қауіпсіздігін қамтамасыз етті. Осы қызметтен кейін құрметті еңбек демалысына шықты, – деді Шығыс Қазақстан облысының Төтенше жағдайлар департаментінде.
ШҚО ТЖД мәліметінше, Әбілқайыр Насырұлы 2009 жылдың сәуір айында Сенное ауылында болған ірі су тасқыны кезінде құтқару операциясына жетекшілік етті. Сондай-ақ Алматыдан автобуспен қайтып келе жатқан фристайлдан құрама спортшылардың қатты боран кезінде жолда қалып қойған сәтінде құтқару операциясын басқарды.
11 адамның барлығы жолда қалып, жедел әрі сауатты ұйымдастырылған іс-шаралардың арқасында оларды құтқару мүмкін болды.
Бүгінде белсенді зейнеткер, ТЖМ ардагері Әбілқайыр Иманбеков жастарға нағыз үлгі болып отыр. Ол жастың белсенділікке, қозғалысқа, жаттығуға және денсаулық пен ұзақ өмірге бастайтын спорттық жеңістерге кедергі емес екенін дәлелдеп келеді.
Источник: ДЧС ВКО
