"Солтүстік Қазақстан облысы Ғабит Мүсірепов атындағы ауданының Бірлік ауылдық округі әкімінің аппараты" коммуналдық мемлекеттік мекемесі·Жаңалықтар мұрағаты
«Дүниежүзілік тазалық күні» (World Cleanup Day) экологиялық акциясы аясында Бірлік ауылдық округінде аумақты абаттандыру және санитарлық тазалау бойынша ауқымды сенбілік өткізілді. 
Іс-шараға ұйымдардың қызметкерлері, ЖШС, жеке кәсіпкерлер, мектеп ұжымдары, ауылдық округ әкімі аппаратының қызметкерлері, ардагер ұстаздар және округ тұрғындары белсенді қатысты. Қатысушылар бірлесіп, аумақтың таза, көрікті әрі абаттандырылған болуына өз үлестерін қосты. 
Тазалық жұмыстары ұйымдардың аумақтарында, саябақтарда, аллеяда, сондай-ақ аулаларда жүргізілді. Акцияға қатысушылар аумақтарды тұрмыстық қоқыстан, қураған өсімдіктерден және басқа да ластанудан тазалап, қоғамдық орындар мен оларға іргелес аумақтарды ретке келтірді.
**Аумақты көгалдандыруға ерекше көңіл бөлінді!** Ауылдық округ әкімі аппаратының қызметкерлері қайың, алхоры және шие көшеттерін отырғызды. 
**Мектеп ұжымы ардагер ұстаздармен бірге округті көгалдандыру жұмыстарына белсенді қатысып, қарағай көшеттерін отырғызды.** Бұл ұрпақтар сабақтастығының және туған өлкенің болашағына деген қамқорлықтың жарқын үлгісі болды. 
Отырғызылған ағаштар мен жеміс-жидек көшеттері округіміздің көркіне көрік қосып, жасыл желекті аумақтардың көбеюіне ықпал етіп, тұрғындарды өзінің әсемдігімен қуантатын болады.
Осындай экологиялық іс-шараларды өткізу қоршаған ортаға жауапкершілікпен қарауды қалыптастыруға, экологиялық мәдениетті арттыруға және тұрғындарды туған өлкені таза, жасыл әрі көрікті ету жолындағы ортақ мақсатқа біріктіруге ықпал етеді! 
Сенбілікке белсенді қатысқан барлық азаматтарға белсенділігі, жанашырлығы, бірлескен еңбегі және Бірлік ауылдық округінің тазалығына, көгалдандырылуы мен абаттандырылуына қосқан үлестері үшін алғыс білдіреміз! **Таза ауыл — баршамызға ортақ іс!** **Бірге туған өлкемізді көркейтейік!** 
