Қазақстанда тұрғын үй қорын ауқымды түгендеу басталады.
Елдің барлық көппәтерлі үйлері бір тізілімге енгізіледі — мекенжайы, қабаттар саны, пәтерлер мен тұрғын емес үй-жайлардың саны, үйдің жағдайы, лифтілер және есепке алу аспаптары көрсетіледі. Бұл жұмыс «Тұрғын үй қатынастары туралы» Заңды орындау мақсатында және «Энергетикалық және коммуналдық секторларды жаңғырту» ұлттық жобасы аясында, сондай-ақ күрделі жөндеу және техникалық тексеру мемлекеттік бағдарламаларын жоспарлау үшін жүргізіліп жатыр.
Түгендеу «Тұрғын үй қатынастары туралы» Заңның 2-бабындағы көппәтерлі тұрғын үй анықтамасына сәйкес келетін барлық ғимараттарды қамтиды: бұл кондоминиум объектісінің ортақ мүгілігінен және екі немесе одан да көп пәтерден немесе тұрғын емес үй-жайлардан тұратын жеке тұрған ғимарат. Есепке қабаттар санына, меншік иелерінің санына, тіркелген кондоминиум объектісінің болуына және таңдалған басқару формасына қарамастан барлық үйлер — соның ішінде ауылдық елді мекендердегі екі және төрт пәтерлі үйлер, сондай-ақ басқару формасы әлі анықталмаған үйлер де кіреді.
Тізілімде әрбір үйдің бірыңғай коды болады — мекенжайдың тіркеу коды (МТК). Осы код арқылы үйге басқа көздерден алынған мәліметтер «жалғанады»: ғимараттың техникалық сипаттамалары, сандық және сапалық көрсеткіштері, үй-жайлар туралы деректер, басқару формасы мен лифтілердің жай-күйі туралы мәліметтер, желілерге қосылу және есепке алу аспаптары туралы деректер.
Мәліметтерді беру тәртібі Тұрғын үй қатынастары және тұрғын үй-коммуналдық шаруашылық саласындағы ақпаратты қалыптастыру, өңдеу, орталықтандырылған жинақтау және сақтау қағидаларымен белгіленген. Сонымен қатар осы қағидаларда деректерді беруге міндетті ұйымдардың шеңбері де анықталған: жергілікті атқарушы органдар, табиғи монополиялар субъектілері, мүлік меншігі иелерінің бірлестіктері, пәтер иелері кооперативтері, басқа да басқару субъектілері.
Меншік иелерінің дербес деректері — тегі, жеке сәйкестендірме нөмірлері, құқық белгілейтін құжаттар мен берешек туралы мәліметтер — түгендеу кезінде жиналмайды.
Тізілімнің беретіні: күрделі жөндеуден өтетін және лифтілері ауыстырылатын үйлердің нақты тізімдері, үйлердің есепке алу аспаптарымен қамтылуының шынайы деңгейін түсіну, орташаланған бағалаулар негізінде емес, нақты деректер негізінде өңірлердің желілерді жаңғыртуға деген қажеттілігін есептеу. Коммуналдық төлемдер түбіртектеріндегі есептеулердің дұрыстығын қамтамасыз ету, ПИК пен МИБ, басқару компанияларының жұмыс пен атқарушы құжаттаманы жүргізу тәртібін арттыру.
Мәліметтерді жинақтауды облыстардың әкімдіктері аудандар мен облыстық маңызы бар қалалардың тұрғын үй инспекциялары арқылы ұйымдастырады. Хабарламалар мен жұмыс нысандары мүлік меншігі иелерінің бірлестіктеріне, бірлескен тікелей басқарудағы үйлердің өкілдеріне, басқару субъектілеріне және коммуналдық қызмет көрсетушілерге жіберіледі.