Адамзат баласы дүниеге келген сәттен бастап ең алдымен отбасының ортасында тәрбиеленеді. Отбасы — бұл жай ғана бір шаңырақ астында тұратын адамдар емес, бұл рухани мектеп, тәрбиенің алтын бесігі. Сондықтан әрбір қоғамның беріктігі мен болашағы ең алдымен сол қоғамдағы отбасылардың қандай екеніне байланысты.
Үлгілі отбасы дегеніміз — барлық жағынан мінсіз отбасы деген сөз емес. Үлгілі отбасы — бұл қиындықты бірге жеңіп, қуанышты бірге бөлісетін, бір-бірінің қадірін білетін шаңырақ. Ондай отбасында үлкенді сыйлау, кішіге қамқорлық, өзара сенім мен сыйластық болады. Қазақ халқы "Ынтымағы жарасқан елдің ырысы артады" деп бекер айтпаған. Себебі отбасындағы бірлік бүкіл қоғамға үлгі болады. Үлгілі отбасынан тәрбиелі, адал, еңбекқор ұрпақ өсіп шығады. Ал тәрбиелі ұрпақ — елдің ертеңі.
Отбасын құру — бұл жай ғана екі адамның қосылуы емес, бұл екі тағдырдың, екі дүниетанымның қосылуы. Сондықтан отбасын құрарда адам алдымен өзіне "Мен не үшін отбасы құрамын? Мен қандай жауапкершілікті аламын?" деген сұрақ қоюы керек. Махаббат маңызды, бірақ отбасы тек махаббатпен ғана тұрмайды. Онда еңбек, түсіністік, кешірім және ортақ мақсат болуы тиіс. Ата-ананың батасын алу, екі отбасының келісімі, материалдық негізді ойлау — бұның барлығы отбасын берік етуге көмектеседі. Себебі ертеңгі күні қиындық келгенде "махаббатпен тойып жүрмейсің". Сол кезде бір-біріне деген сенім мен жауапкершілік керек болады.
Неке — отбасының заңды және рухани негізі. Неке арқылы екі адам қоғам алдында да, Алла алдында да бір-біріне адал болуға уәде береді. Неке қағазы — бұл жай құжат емес, бұл "мен өмірімнің соңына дейін сенімен біргемін" деген үлкен жауапкершілік. Бақытты некенің құпиясы үлкен сөзде емес, күнделікті кішкентай істерде. Бір-біріңді тыңдау, қолдау, қателігін кешіре білу, бірге өсіп-даму — осының барлығы некені берік етеді.
Бүгінгі таңда әлеуметтік желілерде отбасының оң бейнесін сақтау оңай емес. Көбіне дау-дамай, ажырасу, жанжал көп талқыланады. Бірақ дәл сондай кезде үлгілі отбасының құндылығы арта түседі. Өйткені бала ең бірінші ата-анасынан "адам қалай өмір сүру керек" деген сабақты алады.
Қорыта айтқанда, отбасы — мемлекеттің кірпіші. Егер әрбір кірпіш берік болса, ғимарат та берік болады. Үлгілі отбасы құру, саналы түрде некелесу — бұл әр азаматтың Отан алдындағы парызы. "Батырдың текті ұрпағы" болу үшін алдымен "үлгілі отбасының баласы" болу керек. Өйткені ертеңгі күшті Қазақстан бүгінгі берік отбасынан басталады.
Аршын Керей