Қазіргі қоғамда отбасы институтына әсер етіп отырған бірнеше өзекті мәселе бар. Олар әлеуметтік, экономикалық, психологиялық және тәрбиелік факторлармен тығыз байланысты. Солардың ішінде отбасылық құндылықтардың әлсіреуі – ұлттық салт-дәстүрді, үлкенді құрметтеу, ата-ананың жауапкершілігі сияқты құндылықтардың төмендеуі отбасы тұрақтылығына ықпал етуде. Жас отбасылар арасында өзара түсіністіктің төмендеуі, жауапкершіліктің жеткіліксіздігі және тұрмыстық қиындықтар отбасының ыдырауына себеп болуда. Тұрмыстық зорлық-зомбылық, лудомания және интернетке, нашақорлық пен алкогольге тәуелділік, әлеуметтік -экономикалық жағдай, ақпараттық кеңістіктің салдары ажырасу фактілері артуына себеп болып отыр.
Әйелдерге, балаларға және кей жағдайда қарттарға қатысты зорлық-зомбылық отбасының тұрақтылығына және қоғамның қауіпсіздігіне кері әсер етіп отыр.Соның ішінде ұрпақ тәрбиесін уысымыздан шығарып алудамыз. Ата-аналардың жұмысбастылығы, гаджеттерге тәуелділік және тәрбиелік уақыттың азаюы балалардың мінез-құлқы мен құндылықтарының қалыптасуына ықпал етуде. Құмар ойындар мен әлеуметтік желілерге шектен тыс әуестік отбасылық қарым-қатынастың әлсіреуіне, қаржылық қиындықтарға және психологиялық мәселелерге әкелуде. Оған қоса әлеуметтік желілер мен интернеттегі теріс контенттің отбасы мүшелерінің дүниетанымы мен қарым-қатынасына әсері күшейіп келеді. Жас отбасылар ғана емес жағдайы төмен отбасылар үшін тұрғын үй мәселесі, жұмыссыздық, инфляция және қаржылық тұрақсыздықта шешімін таппаған мәселе.
Отбасы – қоғамның негізгі тірегі. Сондықтан отбасы институтын нығайту, ұлттық және отбасылық құндылықтарды дәріптеу, жауапты ата-аналық мәдениетті қалыптастыру, тұрмыстық зорлық-зомбылықтың, тәуелділіктің және басқа да әлеуметтік кеселдердің алдын алу – қазіргі қоғамның маңызды міндеттерінің бірі. Мемлекеттік органдардың, білім беру ұйымдарының, үкіметтік емес ұйымдардың және қоғамның бірлескен жұмысы ғана берік, тәрбиелі әрі жауапты отбасылар санын арттыруға мүмкіндік береді.
Жақсыгүл Шахзадақызы