2025 жылы Астана, Алматы және Шымкент қалаларында қалдықтарды энергетикалық кәдеге жарату (бұдан әрі – ҚЭКЖ) зауыттарын салу бойынша инвестициялар туралы келісімдер (бұдан әрі – ИК) жасалды. Аталған келісімдер шеңберінде осы қалаларда электр энергиясына арналған тариф
1 кВт/сағ үшін 55 теңге мөлшерінде белгіленді.
ҚЭКЖ тетігін енгізудің мақсаты – қалдықтарды қайта өңдеу үлесін арттыру, полигондарға көмілетін қалдықтар көлемін азайту, қалдықтарды кәдеге жарату саласының инвестициялық тартымдылығын арттыру және соның нәтижесінде қалдықтардың қоршаған ортаға теріс әсерін төмендету.
Бүгінде қалдықтарды энергетикалық кәдеге жарату жобалары Еуропаның көптеген елдерінде, Корея Республикасында, Қытай Халық Республикасында, Жапонияда және басқа да мемлекеттерде табысты іске асырылуда.
Қазақстанда іске асырылатын жобалар Еуропалық Одақтың өнеркәсіптік шығарындылар туралы директивасының талаптарын сақтауды көздейді, бұл атмосфералық ауаға ластаушы заттар шығарындыларын барынша азайтуды қамтамасыз етеді.
Осыған байланысты қазіргі уақытта облыс орталықтарында әлеуетті инвесторлармен осындай шарттар негізінде тікелей инвестициялар туралы келісімдер жасасу мәселесі қарастырылуда.
Қазақстан Республикасы Экология және табиғи ресурстар министрлігі Қазақстан Республикасының аумағында қалдықтарды энергетикалық кәдеге жарату жобаларын іске асыруға ниеті мен дайындығы бар мүдделі инвесторлармен өзара іс-қимыл жасауға және ұсынылған бастамаларды жан-жақты пысықтауға дайын екенін білдіреді.