ҚР ТЖМ Жамбыл облысы

Төтенше жағдайлар

департаментінің

2021 жылғы 9 сәуірдегі

№ 94 бұйрығына 3- қосымшасы

Жамбыл облысы Төтенше жағдайлар департаменті

Төтенше жағдайлардың алдын алу басқармасының ережесі

1-тарау. Жалпы ережелер

1. Жамбыл облысы Төтенше жағдайлар департаментінің Төтенше жағдайлардың алдын алу басқармасы (бұдан әрі – Басқарма) Жамбыл облысы Төтенше жағдайлар департаментінің (бұдан әрі – Департамент) табиғи және техногендік сипаттағы төтенше жағдайлардың алдын алу саласындағы мемлекеттік саясатты іске асыруды жүзеге асыратын құрылымдық бөлімшесі болып табылады.
2. Басқарма өз қызметінде Қазақстан Республикасының Конституциясын, Қазақстан Республикасының заңдарын, Президенті мен Үкіметінің актілерін, өзге де нормативтік құқықтық актілерді, сондай-ақ осы Ережені басшылыққа алады.
3. Басқарманың құрылымы мен штат санын Қазақстан Республикасының заңнамасында белгіленген тәртіппен Департамент бастығының ұсынуы бойынша бекітеді.
4. Басқарма, басқарманың бастығымен азаматтық қорғау органдарының төрт қызметкерінен тұрады (бас маман, аға инженер, 2 инженер).

2-тарау. Басқарманың негізгі міндеттері, функциялары, құқықтары мен міндеттері

5. Міндеті: табиғи және техногендік сипаттағы төтенше жағдайлардың алдын алу саласындағы мемлекеттік саясатты қалыптастыру және іске асыру, төтенше жағдайлардың алдын алу мен оларды жоюдың мемлекеттік жүйесінің жұмыс істеуін және одан әрі дамуын қамтамасыз ету.

Функциялары:

1) табиғи және техногендік сипаттағы төтенше жағдайлардың алдын алу саласындағы мемлекеттік саясаттың негізгі бағыттарын әзірлеу;

2) мемлекеттік, салалық бағдарламалармен және тұжырымдамалармен, Министрліктің стратегиялық жоспарымен, жыл сайынғы Операциялық жұмыс жоспарларымен, төтенше жағдайлардың алдын алу саласындағы Министрліктің Стратегиялық жоспарының нысаналы индикаторларына қол жеткізу бойынша Қазақстан Республикасының мүдделі орталық және жергілікті атқарушы органдарымен сектораралық келісімдермен көзделген іс-шараларды қалыптастыруды және одан әрі практикалық іске асыруды қамтамасыз ету;

3) халықты және аумақты табиғи және техногендік сипаттағы төтенше жағдайлардан қорғау жөніндегі перспективалық және ағымдағы жоспарларды әзірлеуді ұйымдастыру;

4) Департаменттің, оның аумақтық органдарының және ведомстволық бағынысты ұйымдарының табиғи және техногендік сипаттағы төтенше жағдайлардың алдын алу және оларды жою мемлекеттік жүйесінің тұрақты жұмыс істеуін қамтамасыз етуге бағытталған бағдарламалардың орындалуын ұйымдастыру;

5) төтенше жағдайлардың алдын алу және оларды жою мемлекеттік жүйесінің жұмыс істеуін және одан әрі дамуын қамтамасыз ету болып табылады;

6) мемлекеттік және жұмылдыру резервтерінің құрамындағы материалдық-техникалық, азық-түлік, медициналық және басқа да ресурстар қорларын пайдалану, сондай-ақ төтенше жағдайлардың алдын алу үшін Қазақстан Республикасы Үкіметінің резервінен қаражатты пайдалану туралы ұсыныстарды талдау, дайындау және Қазақстан Республикасының Үкіметіне енгізу болып табылады;

7) төтенше жағдайлардың алдын алу мүддесінде қару-жараққа, техникаға және басқа да материалдық-техникалық құралдарға қажеттілікті айқындау;

8) табиғи және техногендік сипаттағы төтенше жағдайлардың алдын алу және оларды жою жөніндегі ведомствоаралық мемлекеттік комиссияның жұмысын ұйымдастырушылық-техникалық қамтамасыз ету (жұмыс жоспарын жасау, материалдарды қалыптастыру, отырыстарды дайындау және өткізу), оның хаттамалық шешімдерінің орындалуын бақылауды және талдауды жүзеге асыру;

9) Басқарманың құзыретіне кіретін мәселелер бойынша Департаменттің Алқа отырыстарына материалдар, ақпараттар, анықтамалар, шолулар дайындау;

10) елді мекендер мен шаруашылық жүргізу объектілерін селден, көшкіннен, тасқын мен су тасқынынан қорғау жөніндегі іс-шараларды ұйымдастыру;

11) табиғи және техногендік сипаттағы төтенше жағдайлардың алдын алу саласында халықты, ұйымдардың лауазымды адамдары мен жұмыскерлерін білімді насихаттауды, оқытуды ұйымдастыру;

12) құзыреті шегінде орталық және жергілікті атқарушы органдар мен ғылыми ұйымдардың табиғи және техногендік сипаттағы төтенше жағдайлардың алдын алу саласындағы жұмысын үйлестіру;

13) Департаменттің аудандық бөлімдерімен «Қазселденқорғау» ММ Жамбыл аумақтық пайдалану басқармасы филиалы төтенше жағдайлардың алдын алу саласындағы қызметін үйлестіру;

14) табиғи және техногендік сипаттағы төтенше жағдайлардың алдын алу саласындағы ақпараттық-талдау жұмысы болып табылады;

15) халықты, объектілер мен аумақтарды табиғи және техногендік сипаттағы төтенше жағдайлардан қорғауды қамтамасыз ету бойынша орталық және жергілікті атқарушы органдармен ведомствоаралық және желіаралық өзара іс-қимылдың жай-күйін талдау;

16) табиғи және техногендік сипаттағы төтенше жағдайлардың алдын алу саласындағы әлемдік тәжірибені зерделеуді және қолдануды жүзеге асыру;

17) мемлекеттік органдарды, халықты және ұйымдарды қажетті қауіпсіздік, табиғи және техногендік сипаттағы төтенше жағдайлардың алдын алу жөніндегі шаралар туралы хабардар етуді ұйымдастыру;

18) қауіпті табиғи құбылыстарға мониторинг жүргізетін ұйымдармен өзара іс-қимылды жүзеге асыру және оларды болжау;

19) табиғи және техногендік сипаттағы төтенше жағдайлар саласындағы жерүсті және ғарыштық мониторинг жүйесінің (байқау, болжау, бақылау қызметтері) жай-күйі мен дамуын талдау;

20) Басқарманың қызмет саласына қатысты нормативтерді, стандарттарды және қағидаларды келісу;

21) Табиғи және техногендік сипаттағы төтенше жағдайлардың алдын алу бойынша жүргізілетін іс-шаралар туралы есептерді дайындау және белгіленген тәртіппен Департамент басшылығының қарауына енгізу;

22) Жергілікті атқарушы органдардың төтенше жағдайлардың алдын алуға ЖАО резервінен қаражат бөлу туралы сұрау салуларын белгіленген тәртіппен қарау, кейіннен белгіленген тәртіппен ЖАО тиісті шешімдердің жобаларын ұсына отырып, Департамент басшылығының қарауына дайындау және енгізу;

23) ел аумағындағы табиғи және техногендік сипаттағы төтенше жағдайлар қатерлерінің каталогтарын келісу және бекітуге дайындау;

24) селдің, көшкіннің, сырғыманың, су тасқыны қаупі бар учаскелердің және олардың әсер ету аймақтарында орналасқан объектілердің паспорттарын келісу және бекітуге дайындау;

25) жетекшілік ететін бөлімшелердің жұмысына әдістемелік басшылықты жүзеге асыру және үйлестіру, Басқарма құзыретіне кіретін мәселелер бойынша заңнамалық және өзге де нормативтік құқықтық актілерді қолдануға көмек көрсету;

26) табиғи және техногендік сипаттағы төтенше жағдайлардың алдын алу саласында Департаменттің аумақтық құрылымдық бөлімшелері мен ведомстволық бағынысты ұйымдардың қызметтік іс-қимылын ұйымдастыру және бақылау;

27) азаматтық қорғау саласында еріктілер қызметін жалпы үйлестіру;

28) табиғи және техногендік сипаттағы төтенше жағдайлардың алдын алу саласындағы Департаменттің құрылымдық бөлімшелері мен ведомстволық бағынысты мемлекеттік мекемелердің қызметін жетілдіруге, сондай-ақ ведомстволық бағынысты ұйымдар қызметкерлерінің біліктілігін арттыруға бағытталған семинар-кеңестерді, дөңгелек үстелдерді, тәжірибе алмасу бойынша басқа да іс-шараларды ұйымдастыру және өткізу;

29) табиғи және техногендік сипаттағы төтенше жағдайлардың сипаты, ауқымы, тәуекел дәрежесі туралы бірыңғай деректер банкін құруға қатысу, Мемлекеттік органдардың бірыңғай порталында министірлік бөлімін ақпараттық толықтыруға қатысу;

30) табиғи дүлей зілзалалардың туындауы бойынша қауіпті ошақтарды, учаскелер мен аймақтарды анықтау және мониторинг жүргізу мәселелері бойынша мүдделі мемлекеттік органдармен өзара іс-қимылды ұйымдастыруды қамтамасыз ету:

су тасқыны әсеріне ұшыраған учаскелер мен аумақтарды, көшкін қаупі бар учаскелерді, сел белсенділігі ошақтарын есепке алу;

селдегі және көшкін қаупі бар учаскелердегі, тектоникалық жарықтар аймақтарындағы, есептік сейсмикалығы 8 балдан жоғары учаскелердегі құрылыс жағдайы;

су тасқындарының, тасқындардың, бөгеттердің бұзылуы, жануарлар мен өсімдіктердің қауіпті ауруларының, зиянкестердің пайда болуы бойынша қауіпті учаскелерді, аймақтар мен ошақтарды анықтау, есепке алу және мониторингтеу;

су тасқыны, су тасқыны, бөгеттердің бұзылуы, орман өрттері, жануарлар мен өсімдіктердің қауіпті аурулары және зиянкестермен байланысты төтенше жағдайлардың туындау фактісі бойынша мемлекеттік органдармен жедел ақпаратпен өзара алмасу;

су тасқыны әсеріне ұшыраған учаскелер мен аумақтарды, көшкін қаупі бар

учаскелерді, сел белсенділігі ошақтарын есепке алу;

бірінші кезекте объектілерге, мемлекетаралық, республикалық, облыстық және жергілікті маңызы бар автомобиль жолдарына тікелей қауіп төндіретін қар көшкінінің қалыптасу ошақтарын есепке алу;

31) нормативтік құқықтық актілерді және Департаментке қатысты құқықтық актілерді дайындайды.

32) Қазақстан Республикасының өзге де нормативтік-құқықтық актілерінде көзделген өзге де функцияларды жүзеге асырады.

6. Құқықтары мен міндеттері:

1) Департамент бастығына және Алқа мүшелеріне Басқарманың құзыретіне кіретін мәселелерді алқа отырысында қарау туралы ұсыныстарды енгізуге құқылы;

2) Басқарма қызметкерлерін Төтенше жағдайлар департаменттері бастықтарының жанындағы кеңестердің жұмысына қатысу үшін Басқарманың құзыретіне кіретін мәселелер бойынша аумақтық органдардың басқа да кеңестеріне жолдау;

3) Департаменттің аумақтық органдарында жұмыстың жай-күйіне мақсатты және тақырыптық тексерулерді жүзеге асыруға, кешенді тексерулерді дайындауға және жүргізуге қатысуға;

4) талдамалық зерттеулер, тексерулер мен қызметтік тергеп-тексерулер нәтижелері бойынша Басқарманың құзыретіне кіретін мәселелер бойынша аумақтық органдар бағынысты ұйымдардың, сондай-ақ нақты лауазымды адамдардың қызметіне бағалау беруге міндетті;

5) Басқарманың құзыретіне кіретін мәселелер бойынша кеңестер, семинарлар, конференциялар, оның ішінде халықаралық конференциялар ұйымдастыру және өткізу.

7. Заңдарда, Қазақстан Республикасы Президентінің және Үкіметінің актілерінде белгіленген өзге де құқықтар мен міндеттерді жүзеге асырады.

3-тарау. Басқарманың қызметін ұйымдастыру

8. Басқарма заңнамалық актілерге, Қазақстан Республикасы Президентінің актілеріне, Қазақстан Республикасының өзге де нормативтік құқықтық актілеріне сәйкес өзінің негізгі міндеттері мен функцияларын іске асыру үшін қажетті өкілеттіктерге ие.
9. Басқарма бастығын қызметке тағайындайтын және қызметтен босататын Департамент бастығы құзырлы.
10. Басқарма бастығы құрылымдық бөлімшенің қызметіне жалпы басшылықты жүзеге асырады және мемлекеттік органның құрылымдық бөлімшесіне жүктелген міндеттердің орындалуына және оның функцияларын жүзеге асыруға дербес жауапты болады.
11. Басқарма бастығы Департаменттің басшылығына құрылымдық бөлімшенің құрылымы мен штат кестесі бойынша ұсыныстар береді.
12. Осы мақсатта Басқарма бастығы:

1) өз өкілеттігі шегінде Басқарманың қызметін үйлестіреді;

2) басқарма бастығы болмаған кезде басқарма қызметіне жалпы басшылықты жүзеге асырады.

13. Басқарма құзыретіне кіретін мәселелер бойынша Басқарма атынан Басқарманың басқа құрылымдық бөлімшелеріне жіберілетін құжаттарға Басқарма бастығы, ал ол болмаған жағдайда оны алмастыратын тұлға қол қояды.
14. Қажет болған жағдайда Басқарма осы Ережеге өзгерістер мен толықтырулар енгізуге бастамашылық жасайды.

_______________________