Белое ауылдық округінің әкімі Нұрлан Қайроллаұлы Жанбұлов округ тұрғындарымен кездесу өткізіп, елді мекендердің қауіпсіздігі мен тұрғындардың әл-ауқатына қатысты өзекті мәселелерді талқылады.
Кездесу барысында елді мекендерді абаттандыру, интернет-алаяқтықтың алдын алу, ауыл шаруашылығы жануарларын бақылаусыз жаюға және олардың Ресей Федерациясының аумағына өтіп кетуіне жол бермеу мәселелері қаралды. Сондай-ақ Мемлекеттік шекара маңында өрттің туындауына жол бермеу, өрт қауіпсіздігі талаптарын сақтау және Қазақстан Республикасының шекара заңнамасының талаптарын орындау мәселелеріне ерекше назар аударылды.
Кездесу барысында тұрғындарға көтерілген әрбір мәселе бойынша жан-жақты түсіндірме жұмыстары жүргізіліп, қолданыстағы заңнаманы сақтау, қоғамдық тәртіпті қамтамасыз ету, қауіпсіздікті нығайту және ауылдық округтің қолайлы өмір сүру ортасын қалыптастыру әрбір азаматтың ортақ міндеті екені атап өтілді.
