Қала күнін мерекелеу аясында «Таза Қазақстан» экологиялық бастамасы аясында өткізілетін «Үздік аула» байқауының жеңімпаздары мен қатысушыларын марапаттау рәсімі өтті. Байқау өз күшімен үй маңындағы аумақты көркейтіп, тазалықты сақтап, жайлы орта қалыптастырып жүрген тұрғындарды атап өтуге мүмкіндік берді. Құрметті марапаттауларды Жітіқара қаласының әкімі М. Ж. Ордашев табыс етті. Ол байқауға қатысушыларға бастамашылдығы мен абаттандыру жұмыстарына бей-жай қарамай, белсенділік танытқаны үшін алғыс білдірді. Мұндай жобалар туған қаланың жайлылығы мен көркеюі әр адамның қарапайым, бірақ маңызды істерінен басталатынын көрсетеді.
Тәуелсіздік алаңында қала тұрғындары мен қонақтарын біріктірген үлкен мерекелік іс-шара өтті. Таңертеңнен бастап мұнда шығармашылық шаралар ұйымдастырылды: «Әнші балапан» балалар вокалдық байқауы, «JITIQARA Fest-2026» аралас би байқауы және вокалды-аспаптық ансамбльдер фестивалі өтті. Тұрғындар үшін «Ашық аспан астындағы музей» көрмесі, Балалар бульвары, кітап инсталляциясы және Тілектер қабырғасы ұйымдастырылды. Мерекенің маңызды бөлігі – салтанатты марапаттау рәсімі болды. Көпбалалы аналарға «Алтын алқа» және «Күміс алқа» төсбелгілері табысталды. Сондай-ақ көп жылғы еңбегі үшін және Қала күніне орай Қостанай облысы әкімінің Құрмет грамоталары, жоғары кәсібилігі мен адал еңбегі үшін Жітіқара ауданы әкімінің Құрмет грамоталары табысталды. Кешкі уақытта мерекенің салтанатты ашылуы өтіп, Жітіқара, Қостанай және Лисаков қалаларының шығармашылық ұжымдарының қатысуымен мерекелік концерт ұйымдастырылды. Азамат Ибраев пен би дуэті өздерінің жарқын өнерін ұсынды. Қала тұрғындары үшін қазақстандық эстрада жұлдыздары Айдана Меденова мен Ұланғасыр Қамидің өнер көрсетуі ерекше сый болды. Мерекелік кеш жарқын отшашумен аяқталды.
Жітіқара қаласының күні – осында туып-өскен, өмір сүріп, еңбек етіп, тағдырын туған жерімен тоғыстырған барша жандар үшін айрықша мәні бар мереке. Бұл – қаламыздың тарихына көз жүгіртіп, оның қалыптасуы мен өркендеуіне өз еңбегімен үлес қосқан азаматтардың өнегелі жолын дәріптейтін тағылымды күн. Биыл Жітіқара қаласының құрылғанына 87 жыл толып отыр. Осы жылдар ішінде қаламыз талай белесті еңсеріп, заман талабына сай жаңарып, өркендей отырып, өзінің қалыптасқан дәстүрі мен қайталанбас болмысын сақтап келеді. Оның басты байлығы – туған жеріне жанашырлықпен қарап, ел игілігі жолында аянбай еңбек етіп жүрген отансүйгіш, бастамашыл азаматтар. Биыл біздің өңіріміз үшін де мерейлі жыл – Қостанай облысының құрылғанына 90 жыл толып отыр. Бұл – аймақтың бай тарихын, қол жеткізген жетістіктерін және туған өлкенің өсіп-өркендеуіне бірнеше буын өкілдерінің қосқан өлшеусіз үлесін айшықтайтын маңызды белес. 2026 жыл еліміздің қоғамдық-саяси өміріндегі маңызды оқиғалармен ерекшеленеді. Құрылтай депутаттарының сайлауы өтті. Ол қоғамдық диалогты дамытуға, ел үшін өзекті мәселелерді талқылауға және Қазақстанның одан әрі дамуына бағытталған ұсыныстарды қалыптастыруға мүмкіндік беретін маңызды алаңға айналды. Бұл үрдістердің өзегінде бейбітшілік пен келісім, қоғамдық бірлік және азаматтық жауапкершілік секілді құндылықтар жатыр. Аталған қағидаттар Қазақстан Республикасының жаңа Конституциясында өз көрінісін тапты. Қаламыздың жыл сайын көркейіп, жаңарып, тұрғындары үшін жайлы да құтты мекен ретінде өркендей беруіне тілектеспін. Барша жітіқаралықтарға зор денсаулық, отбасыларыңызға амандық, бақ-береке, молшылық тілеймін. Әр шаңырақта жылулық пен қуаныш орнасын. Туған қаламыздың өзіндік дара болмысы сақталып, оның жарқын келешегі бүгінгі және келер ұрпақтың ортақ игілігіне айнала берсін. Жітіқара ауданының әкімі А.Жаныспаев
Мереке аясында аудан спортының дамуына үлес қосып жүрген спортшыларға, жаттықтырушыларға және спорт саласының өкілдеріне құрмет көрсетілді. Салтанатты жиында аудан әкімі А. Жаныспаев құттықтау сөз сөйлеп, барша спорт жанашырларын мерекемен құттықтады. Спортшыларға зор денсаулық, жаңа жеңістер мен биік белестер тіледі. Іс-шара барысында аудан спортының дамуына елеулі үлес қосып, жоғары нәтижелерге қол жеткізген азаматтарға марапаттар табысталды. Қостанай облысының XXXIX жазғы спартакиадасына командаларды дайындаған жаттықтырушылардың еңбегі ерекше атап өтілді. Жітіқара спортшылары бокс, әйелдер күресі, жеңіл атлетика, қазақ күресі, баскетбол, волейбол, дзюдо және спорттың өзге де түрлерінен лайықты нәтижелер көрсетті. Барша спортшылар мен жаттықтырушыларды спорт күнімен құттықтаймыз! Мықты денсаулық, толағай табыс, жаңа жеңістер мен биік жетістіктер тілейміз! 🥇
Жітіқара қаласындағы Тәуелсіздік алаңында Ұлттық домбыра күніне арналған мерекелік іс-шара өтті. Биылғы мереке еліміз үшін айрықша кезеңмен тұспа-тұс келіп отыр. Қазақстан Республикасының жаңа Конституциясы күшіне енген алғашқы күндер ел дамуының жаңа кезеңін айқындап, ұлттық құндылықтарды сақтау, тарихи мұраны қастерлеу және қоғамдық бірлікті нығайту қағидаттарына негізделген жаңа бағытты паш етеді. Қала тұрғындары мен қонақтарына шығармашылық ұжымдардың, жеке орындаушылар мен қазақтың ұлттық аспаптар ансамбльдерінің қатысуымен концерттік бағдарлама ұсынылды. Іс-шара аясында ұлттық музыка өнерін сақтау, дамыту және кеңінен насихаттау жолында елеулі еңбек етіп жүрген мәдениет саласының өкілдері Алғыс хаттармен марапатталды. Мереке аясында домбыраның тарихы мен қазақ халқының мәдениетіндегі орнына арналған тақырыптық көрме де көпшілік назарына ұсынылды. Бұл мереке – халқымыздың төл мәдениеті мен рухани мұрасына деген құрметтің, ұлттық бірлік пен сабақтастықтың жарқын көрінісі.
Қазақстан Республикасының Астана күнімен шын жүректен құттықтауымды қабыл алыңыздар! Бүгінде Астана – еліміздің бас қаласы ғана емес, тәуелсіздігіміз бен бірлігіміздің, қарыштап дамыған мемлекетіміздің символы. 28 жылдың ішінде дала төсінде бой көтеріп, заманауи саяси, экономикалық және мәдени орталыққа айналған. Мұнда әлемнің талай мемлекетттерінің серкелері бас қосып, пікір алмасып, маңызды шешімдер қабылданып жүр. Соңғы жылдары дәл осы қасиетті шаһарда ауқымды саяси реформалар жүзеге асырылды. Жалпыхалықтық референдум қорытындысы бойынша Қазақстан Республикасының Конституциясына енгізілген өзгерістер мен толықтырулар мемлекет дамуының жаңа кезеңіне жол ашып, әділеттілік қағидаттарын, заң үстемдігін және мемлекеттік басқарудың ашықтығын нығайтты және азаматтардың жалпыұлттық маңызы бар мәселелерді шешуге қатысу мүмкіндігі кеңейтті. Астана әрдайым жасампаздықтың, бейбітшілік пен келісімнің тұғырлы нышаны болып, оның толайым жетістіктері бүкіл республикамыздың одан әрі өсіп-өркендеуіне үлес қоса берсін. Баршаңызға зор денсаулық, бақ-береке, баянды бақыт пен ізгілік тілеймін! Тәуелсіз еліміз әрдайым өркендеп, бірлігі бекем, тұрақтылығы мығым болып, бүгінгі және келер ұрпақтың игілігі жолында қарыштай берсін! Жітіқара ауданының әкімі А. Жаныспаев
