Муслымов Ахат Кадирович

Мүслімов Ахат Кәдірұлы Қазақ ұлттық техникалық университетін “инженер- механик” мамандығы бойынша аяқтаған. Өз еңбек жолын 1992 жылы Қоңырат кенішіндегі автокөлік цехында механик болып бастады.

Балқаш кен металлургия комбинатының материалды-техникалық жабдықтау бөлімінде инженер – экономист мамандығы бойынша жұмыс істеді, 1998-2001 жылдар аралығында Балқаш кен байыту фабрикасында бас инженердің орынбасары, содан кейін директордың орынбасары болып қызмет атқарды. 2001-2003 жылдар аралығында материалдық-техникалық жабдықтау басқармасында экономист болып жұмыс істеді. 2003 жылдан қазірге дейін кабельдік теледидарды таратушы ЖШС “Алтын-Арна” директоры, сонымен қатар «Балқаш қаласы кәсіпкерлер мен өнеркәсіпшілер одағы» заңды тұлғалар мен кәсіпкерлер бірлестігінің төрағасы.

Ахат Кәдірұлы кәсіпкерлер одағының төрағасы ретінде Балқаш өңіріндегі кіші, орта бизнестердің дамуына атсалысуда. Өз қаласының патриоты ретінде мемлекеттік-жекеменшік серіктестік аясында "Қауіпсіз қала" жобасы бойынша қаланың барлық аудандарында бейнебақылау құрылғыларын орнатып, Балқаш қаласындағы тәртіптің сақталуы жолында баға жетпес үлес қосуда.

Сонымен қатар, Балқаш қалалық маслихатының V және VII-шақырылым депутаттығы қызметінің аясында қаланың қоғамдық өміріне белсене араласады. Жастар фестивальдерін өткізуге, спорттық шараларға, мүгедек балаларға, үкіметтік емес ұйымдарға әр түрлі демеушілік көмек көрсетеді. Қаладағы Ұлы Отан соғысының, ауған соғысының ардагерлеріне кабельдік телеарна желісін көруге тегін қызмет көрсетуді енгізді.

Балқаш қаласы телеарнасының жұмысын жандандырып, ел тұрмысы мен бүгінгі тынысы жайында жаңалықтарды, әр түрлі бағдарламаларды сәтті түрде таратып, мемлекетіміздің саясатын халыққа жеткізуде ерен еңбек етуде.