2029 жылға дейінгі Жол картасы: апатты үйлер кезең-кезеңімен жаңартылады.

ҚР ӨҚМ Құрылыс және тұрғын үй-коммуналдық шаруашылық істері комитеті төрағасының орынбасары Қанат Мыңбаевтың айтуынша, жергілікті атқарушы органдар 2029 жылға дейін апатты және тозығы жеткен тұрғын үйлердің меншік иелерін жаңа баспанамен қамтамасыз ету жөніндегі Жол карталарын қайта бекітті.

«2023 жылы апатты тұрғын үйлердің меншік иелері үшін 52 көппәтерлі тұрғын үй (КПТҮ) салынды, 75 үй бұзылды және 1 010 меншік иесі жаңа тұрғын үймен қамтамасыз етілді. 2024 жылы 121 КПТҮ жоспардың ішінде 115 КПТҮ бұзылып, 1 381 меншік иесі жаңа тұрғын үймен қамтамасыз етілді, сондай-ақ 80 КПТҮ салынды. 2025 жылы жоспарланған 227 КПТҮ-нің 101-і бұзылды. Оның ішінде жеке инвесторлар есебінен 62 КПТҮ, мемлекеттік бюджет қаражаты есебінен 39 КПТҮ бұзылды. Жаңа тұрғын үймен қамтамасыз етілген меншік иелерінің саны – 2 605 адам. Сонымен қатар, 2026 жылы 224 КПТҮ бұзу жоспарлануда, бүгінгі таңда 44 КПТҮ бұзылды», - деді спикер ОКҚ алаңында өткен баспасөз конференциясында.

Қазіргі уақытта әкімдіктер апатты және тозығы жеткен тұрғын үйлерді бұзу, сондай-ақ осындай үйлердің меншік иелерін жергілікті бюджет қаражаты есебінен өтемақы төлеу және қайталама нарықтағы тұрғын үйлерді сатып алу арқылы қамтамасыз ету жұмыстарын жүргізуде. Ақмола облысында «тұрғын үй қорын реновациялау» бағдарламаларын іске асыруды және «үлестік қатысу» негізінде салынып жатқан тұрғын үйлердің құрылысын аяқтауды ынталандыру құралы ретінде «дайын тұрғын үйлерді сатып алу тетіктері» қолданылды.