Қазақстанда азаматтарға дәрілік заттарды өз бетінше тексеруге, олардың таңбалануы мен қадағалану мүмкіндігі туралы ақпарат алуға, сондай-ақ белгіленген шекті бағалардың сақталуын бақылауға мүмкіндік беретін NAQTY ONIM цифрлық құралы жұмыс істейді.
Қосымша тауарларды цифрлық таңбалау және қадағалаудың мемлекеттік жүйесі шеңберінде әзірленген. Оны пайдалану фармацевтикалық нарықтың ашықтығын арттыруға ықпал етеді және тұтынушылардың құқықтарын қорғаудың қосымша мүмкіндіктерін қамтамасыз етеді.
Дәрілік затты қалай тексеруге болады
2024 жылғы 1 шілдеден кейін өндірілген дәрілік заттардың қаптамасына бірегей Data Matrix коды орналастырылады.
Дәрілік затты тексеру үшін NAQTY ONIM қосымшасын ашып, смартфон камерасының көмегімен кодты сканерлеу қажет.
Сканерлегеннен кейін пайдаланушы дәрілік зат туралы, оның ішінде мынадай ақпаратты ала алады:
* дәрілік заттың атауы;
* өндіруші туралы ақпарат;
* тіркеу деректері;
* таңбалау мәртебесі;
* дәрілік заттың заңды шығу тегі туралы мәліметтер;
* дәрілік заттың жеткізу тізбегі бойынша қозғалысы туралы ақпарат.
Цифрлық таңбалау дәрілік заттың өндірушіден немесе импорттаушыдан дистрибьюторға, дәріханаға және түпкілікті сатып алушыға дейінгі қозғалысын қадағалауға мүмкіндік береді.
Дәрілік заттардың бағаларын бақылау
Қосымшаның тағы бір мүмкіндігі дәрілік заттардың бағаларын тексеруге байланысты.
Пайдаланушы дәрілік затқа мемлекет белгілеген шекті бөлшек сауда бағасын біліп, оны дәріханадағы дәрілік заттың құнымен салыстыра алады.
Егер баға белгіленген шекті деңгейден асып кетсе, азамат бұл туралы көзделген цифрлық сервистер арқылы хабарлап, ақпаратты уәкілетті органдардың одан әрі қарауына жібере алады.
Азаматтардың бақылауға қатысуы
NAQTY ONIM азаматтарға сатып алынатын дәрілік заттар туралы ақпаратты өз бетінше алуға және ықтимал бұзушылықтар туралы хабарлауға мүмкіндік береді.
Мұндай цифрлық құралдар мемлекеттік бақылауды толықтырып, белгіленген талаптарды бұза отырып дәрілік заттарды өткізу жағдайларын уақтылы анықтауға ықпал етеді.
Цифрлық таңбалау не үшін қажет
Цифрлық таңбалау және қадағалау жүйесі:
* жеткізудің әртүрлі кезеңдерінде дәрілік заттардың қозғалысын бақылауға;
* заңсыз өткізілетін өнімді анықтауға;
* жалған және контрафактілік дәрілік заттардың айналымға түсу тәуекелдерін төмендетуге;
* дәрілік заттарды өткізуге қойылатын белгіленген талаптардың сақталуын бақылауға;
* азаматтардың сатып алатын дәрілік заттары туралы хабардарлығын арттыруға мүмкіндік береді.
NAQTY ONIM-ді пайдалану сатып алушыға дәрілік затты сатып алар алдында оның таңбалануын тексеруге және дәрілік зат туралы қажетті ақпаратты алуға мүмкіндік береді.
