2026 жылғы 24 маусымда Қарағанды өңірінің көлік қызметкерлері арасында трихофития ауруының тіркелуіне байланысты жүргізіліп жатқан эпидемиологиялық тергеу аясында Қарағанды бөлімшелік санитариялық-эпидемиологиялық бақылау басқармасының мамандары «ҚТЖ» ҰК» АҚ – «Қарағанды магистралдық желі бөлімшесі» филиалының Ақадыр жол дистанциясы (ПЧ-26, Мойынты станциясы) қызметкерлерімен «сұрақ-жауап-пікірталас» форматында семинар өткізді. Іс-шараның мақсаты – қызметкерлердің гигиеналық сауаттылығын арттыру және жұқпалы аурулардың алдын алу. Семинар барысында трихофитияның жұғу жолдары, негізгі белгілері, диагностикасы, емдеу және алдын алу шаралары түсіндірілді. Сондай-ақ жеке гигиенаны сақтау мен науқастарды уақтылы анықтаудың маңыздылығы айтылды. Қатысушыларға трихофития мен басқа да саңырауқұлақ ауруларының, туберкулездің алдын алу және мемлекеттік қызметтер көрсету мәселелері бойынша ақпараттық жадынамалар мен брошюралар таратылды.
