Құрметті әріптестер, санитариялық-эпидемиологиялық қызметтің ардақты ардагерлері!
Сіздерді ұлттық мереке – Қазақстан Республикасы күнімен шын жүректен құттықтаймыз! 25 қазан – еліміздің тарихындағы айрықша күн. Бұл күн мемлекеттілігіміздің, халқымыздың бірлігінің, тәуелсіздігіміздің және жасампаздыққа ұмтылысымыздың символы болып табылады. Аталған мереке адал еңбегімен Қазақстанның дамуына, ел игілігі мен өркендеуіне үлес қосып жүрген барша азаматты біріктіреді.
Санитариялық-эпидемиологиялық қызмет мамандары үшін бұл мерекенің маңызы ерекше. Біздің кәсібіміз – халық денсаулығына жауапкершілікпен қарау, санитариялық-эпидемиологиялық саламаттылықты қамтамасыз ету, жұқпалы аурулардың алдын алу және әрбір азаматтың өмір сүруіне қауіпсіз орта қалыптастыру. Қызмет мамандарының күнделікті еңбегі еліміздің денсаулық сақтау жүйесі мен қоғамдық қауіпсіздігін қамтамасыз етудің маңызды бөлігі болып табылады.
Осы айтулы күні санитариялық-эпидемиологиялық қызметтің ардагерлеріне көпжылдық адал әрі жанқиярлық еңбегі, жоғары кәсібилігі, өз ісіне деген беріктігі және Қазақстандағы санитариялық-эпидемиологиялық бақылау жүйесінің қалыптасуы мен дамуына қосқан баға жетпес үлесі үшін шынайы алғысымызды білдіреміз. Сіздердің тәжірибелеріңіз, даналықтарыңыз бен кәсіби борышқа адалдықтарыңыз жас мамандар үшін өнеге.
Құрметті әріптестер! Ортақ еңбегіміз ұлтымыздың денсаулығын нығайтуға, халықтың өмір сүру сапасын арттыруға және туған еліміздің игілігін еселеуге әрдайым қызмет ете берсін!
Баршаңызға зор денсаулық, бейбітшілік, амандық, отбасыларыңызға бақ-береке, кәсіби табыс пен ел игілігі жолындағы жаңа жетістіктер тілейміз!
Еліміз өркендеп, халқымыз татулық пен келісімде өмір сүрсін! Қазақстанның болашағы жарқын, тұрақты әрі берекелі болсын!
Ізгі ниетпен, Комитет ұжымы.
