Солтүстік Қазақстан облысында ұрланған автокөлікті ақмола патрульдік қызметкерлері жедел тапты

Ақмола патрульдік қызметкерлері Солтүстік Қазақстан облысынан ұрланған автокөлікпен жасырынуға тырысқан ұрыны жедел ұстады.
20 қазан күні таңертең полиция қызметкерлері ұрланған ВАЗ-2112 көлігіне бағдар алды. Солтүстік Қазақстан әріптестерінің мәліметінше, түнде белгісіз адам Мамлют ауданы Новомихайловка ауылының тұрғынынан көлік ұрлап кеткен. Қаскүнем Ақмола облысының жолдарымен жүруі мүмкін деп болжанды.
Бағдар дереу аймақтың барлық патрульдік экипаждарына берілді. Сонымен бірге әкімшілік полиция басқармасы іздеу тобының қызметкерлері көліктің ықтимал жүру бағыты бойынша бейнебақылау камераларының мониторингін бастады.
Жедел іс-шаралар нәтижесінде іздестіріліп жатқан машинаның Зеренді ауданының аумағында болуы мүмкін екендігі анықталды. Көп ұзамай патрульдік полиция батальонының 5-ші взводының инспекторлары-капитан Алтынбек Накенов пен лейтенант Мирас Хамитов Астана-Петропавл автожолында автокөлікті тоқтатты.
Көліктің табылғаны туралы ақпарат Зеренді ауданы полиция бөлімінің тергеу-жедел тобына және Солтүстік Қазақстан облысының әріптестеріне хабарланды.