Қарағандыда бес күн ішінде үш велосипед ұрланған. Келтірілген материалдық шығын 300 мың теңгеден асты. Аталған қылмыстарға қатысы бар деген күдікпен 33 жастағы ер адам мен 29 жастағы әйел ұсталды.
Оңтүстік-шығыс полиция бөлімінің қызметкерлері велосипед ұрлығына қатысты бірнеше қылмысты ашты. Жәбірленушілерден арыз түскеннен кейін жедел уәкілдер күдіктілерді анықтау үшін жедел-іздестіру шараларын жүргізді. Нәтижесінде жергілікті екі тұрғын ұсталды.
Тергеу мәліметінше, күдіктілер бірге әрекет етіп, жұрттың күдігін тудырмауға тырысқан.
Қазір аталған фактілер бойынша сотқа дейінгі тергеп-тексеру жүргізіліп жатыр.
Ұсталғандар уақытша ұстау изоляторына қамалды.
Полиция олардың қала аумағында жасалған өзге де осыған ұқсас қылмыстарға қатысы бар-жоғын тексеріп жатыр.
Осыған байланысты полиция тұрғындарды велосипедтер мен самокаттарды, сондай-ақ балалар арбаларын кіреберістерде және дүкендердің маңында қараусыз қалдырмауға шақырады. Екі дөңгелекті көліктерді арнайы ұрлыққа қарсы құлыппен бекітіп, мүмкіндігінше қауіпсіз жерде сақтау ұсынылады.
Сондай-ақ бейнебақылау камералары бар жерлерде де жеке заттардың қауіпсіздігіне немқұрайлы қарамау қажет.
