Бақытымызға орай, бұл жолы ешқандай қайғылы жағдай орын алған жоқ. Алайда алкогольдік масаң күйде көлік жүргізу орны толмас өкінішке әкелуі мүмкін еді.
Таңсәріде Талдықорған қаласында патрульдік полиция қызметкерлері Nissan Juke автокөлігін тоқтатты. Көлік тізгінінде 40 жастағы жергілікті тұрғын болған. Тексеру нәтижесінде әйелдің алкогольдік масаң күйде көлік басқарғаны анықталды.
Сот шешімімен жүргізуші 7 жыл мерзімге көлік құралдарын басқару құқығынан айырылып, оған 15 тәулікке әкімшілік қамаққа алу жазасы тағайындалды.
Бұл жолы бәрі қайғылы жағдайсыз аяқталды. Алайда мас күйде жолға шыққан әрбір жүргізуші адам өміріне қауіп төндіреді. Ойланбай қабылданған бір ғана шешім адам өмірін қиюы немесе бірнеше отбасының тағдырын түбегейлі өзгертуі мүмкін.
Алкоголь адамның зейінін төмендетіп, реакциясын баяулатады және жолдағы жағдайды дұрыс бағалау қабілетін әлсіретеді. Мұндай жағдайда тек жүргізушінің өзі ғана емес, жолаушылар, жаяу жүргіншілер мен жол қозғалысының басқа да қатысушылары қауіп-қатерге ұшырайды.
Полиция ескертеді: ішімдік ішсеңіз, рөлге отырмаңыз! Жолдағы жауапкершілік әр адамның жеке таңдауынан басталады. Өз өміріңіз бен айналаңыздағы адамдардың өмірін қауіпке тікпеңіз.
