Қауіпсіздік үйден басталады: Астанада «Қауіпсіз үй» жедел-профилактикалық іс-шарасы өтуде

Елордада «Қауіпсіз үй» жедел-профилактикалық іс-шарасы аясында тұрғын үй секторында қауіпсіздікті қамтамасыз ету, құқық бұзушылықтардың алдын алу және азаматтардың құқықтық сауаттылығын арттыру бағытында кешенді жұмыстар жүргізілуде.
Профилактикалық жұмыстар барысында полиция қызметкерлері тұрғын үйлер мен аулаларды аралап, қоғамдық тәртіптің сақталуын тексереді, профилактикалық есепте тұрған азаматтардың тұрғылықты жерлері бойынша тиісті тексеру жүргізеді.
Атап айтқанда, отбасылық-тұрмыстық құқық бұзушылықтардың алдын алу, жанжал жағдайларын дер кезінде анықтау, қоғамдық орындарда тәртіп сақтау және тұрғындардың тыныштығын бұзатын әрекеттердің жолын кесу мәселелері басты назарда.
Іс-шара барысында азаматтық қару иелерінің қаруды сақтау қағидаларын сақтауына да назар аударылады. Мәселен, Мұхамедханов көшесіндегі мекенжайлардың бірінде жүргізілген тексеру нәтижесінде құқық бұзушылық анықталып, Қазақстан Республикасының Әкімшілік құқық бұзушылық туралы кодексінің 486-бабының 1-бөлігі бойынша әкімшілік хаттама толтырылды.
Полиция азаматтарды құқық бұзушылықтарға бейжай қарамауға, заң талаптарын сақтауға, өз ауласы мен тұрғын үйінің қауіпсіздігіне жауапкершілікпен қарауға және ұсынылған QR-кодтарды белсенді пайдалануға шақырады. Қауіпсіз үй — тыныш ауладан, жауапты тұрғыннан және ортақ тәртіптен басталады!