Қарағандыда құрылыс компаниясы 200 мың теңгеден астам айыппұл арқалап, 100 көшет отырғызуға міндеттелді

Қарағандыда құрылыс компаниясы 200 мың теңгеден астам айыппұл арқалап, 100 көшет отырғызуға міндеттелді. Тұрғындардың әлеуметтік желідегі бейнеүндеуі полицияның жедел әрекет етуіне түрткі болды. Тексеру қорытындысы бойынша құрылыс компаниясы әкімшілік жауапкершілікке тартылып, аумақты қалпына келтіруге міндеттелді. Қарағандыда тұрғындардың шағымынан кейін құрылыс компанияларының бірінің өкілі абаттандыру және жасыл желектерді қорғау талаптарын бұзғаны үшін жауапқа тартылды. Оқиғаға тұрғын үй маңындағы жөндеу жұмыстары себеп болған. Тұрғындар жүргізіліп жатқан жұмыстарға наразылық білдіріп, әлеуметтік желіде бейнеүндеу жариялаған. Азаматтардың өтінішіне Оңтүстік-Шығыс полиция бөлімінің қызметкерлері жедел ден қойып, тексеру жүргізді. Тексеру барысында абаттандыру қағидалары мен жасыл желектерді күтіп ұстау талаптарының бұзылғаны анықталды. Нәтижесінде құрылыс компаниясы әкімшілік жауапкершілікке тартылды. Құқық бұзушылықтар үшін жалпы сомасы 217 060 теңге айыппұл салынды. Оның 86 500 теңгесі абаттандыру қағидаларын бұзғаны үшін, ал 130 560 теңгесі жасыл желектерді күтіп ұстау және қорғау талаптарын сақтамағаны үшін белгіленді. Алайда бұл жолы жауапкершілік айыппұл төлеумен ғана шектелмеді. Құрылыс компаниясының өкілі анықталған кемшіліктерді қысқа мерзімде жоюға, бүлінген аумақты қалпына келтіруге және өз қаражаты есебінен 100 көшет отырғызуға міндеттеме алды. Сонымен қатар алынған тротуар тақталарының орнына қайта төселуі қамтамасыз етілуі тиіс. Серіктестік өкілі тұрғындарға келтірілген қолайсыздықтар үшін ресми түрде кешірім сұрады. Бұл жағдай қала тұрғындарының белсенді азаматтық ұстанымы мен полицияның жедел әрекетінің нәтижесінде мәселенің назардан тыс қалмайтынын көрсетті. Полиция азаматтарды қоғамдық тәртіп пен абаттандыру қағидаларының бұзылуына бейжай қарамай, мұндай фактілер туралы хабарлауға шақырады. Қаланың тазалығы мен жасыл желегін сақтау — баршаға ортақ міндет.