Бүгін аудан әкімі Ерлан Төрәлиевтің төрағалығымен мәжіліс өтті. Мәжілісте егін жинау науқанының барысы қаралды.
Аудан әкімі егін жинау жұмыстарын белгіленген мерзімде сапалы аяқтап, сала басшыларына бірқатар нақты міндеттер жүктеді.
«Егінді ысырапсыз, уақытында толық жинап алуымыз керек. Қазіргі таңда егін жинау жұмыстары қарқынды жүргізілуде. Науқанды белгіленген мерзімде аяқтау үшін барлық мүмкіндікті тиімді пайдалану қажет», – деді Е.Төрәлиев.
Сонымен қатар, шаруашылық құрылымдарында жұмысшылардың еңбек құқықтарының сақталуы, еңбекақы бойынша берешекке жол бермеу бойынша шаруашылық иелеріне түсіндіру жұмыстарын жүргізу міндеттелді.
Жалағаш ауданы бойынша 2026 жылы 41 864 гектарға ауыл шаруашылығы дақылдары орналастырылды. Оның ішінде 16 618 гектарға күріш егілді.
Биыл ауыспалы егіс ротациясы тәртібін бұзған шаруашылық құрылымдары анықталған жоқ. Су жеткізу қызметін алу бойынша «Жалағашсушар» өндірістік учаскесімен 166 шаруашылық жалпы құны 1 млрд 153,7 млн теңгеге келісімшарт жасасты.
Аудан шаруашылықтары тарапынан биыл 1 млрд 154,9 млн теңгеге 4 дана ауыл шаруашылығы техникасы сатып алынды. Қазіргі таңда аудан бойынша егін жинау жұмыстарына 1005 дана ауыл шаруашылығы техникасы қатысуда. Оның ішінде 131 комбайн, 502 трактор, 124 жатка, 73 жүк көлігі және 175 трактор тіркемесі бар.
Жиын қорытындысымен күн тәртібінде қаралған мәселелер бойынша жауапты сала басшыларына бірқатар тапсырмалар берілді.
