23 қыркүйектен бастап Солтүстік Қазақстан облысында қауіпсіздік мәдениетін арттыруға, құқық бұзушылықтардың алдын алуға және азаматтардың отбасы, балалар мен қоғам қауіпсіздігіне жауапкершілікпен қарауын қалыптастыруға бағытталған республикалық «Қауіпсіздік коды» акциясы өтуде. Жыл басынан бері облыста отбасылық-тұрмыстық қатынастар саласында 1800-ден астам құқық бұзушылық тіркелген. Бұл санның әрқайсысының артында жанжалға, зорлық-зомбылыққа және оның салдарына тап болған нақты отбасы тұр. Полицияда қауіпсіздік әр адамнан басталатынын атап өтті. Ал құқық бұзушылықтарға мүлдем төзбеушілік «Заң мен тәртіп» қағидатын нығайтудың негізгі тетіктерінің бірі болып саналады. Полиция департаменті отбасы және балалардың құқықтарын қорғау мәселелері бойынша 111 байланыс орталығына, полицияға 102 нөмірі арқылы жүгінуге болатынын еске салады. Құқық бұзушылық туралы 102 мобильді қосымшасы, сондай-ақ eGov Mobile, Halyk және Kaspi қосымшаларындағы «Заң мен тәртіп» бөлімдері арқылы да хабарлауға болады. «Қауіпсіздік коды» акциясы 25 қыркүйекке дейін жалғасады. Алайда отбасылық-тұрмыстық зорлық-зомбылықтың алдын алу және оны анықтау полицияның күнделікті міндеті болып қала береді.
