Атырау облысының аумағында 15-17 қыркүйек аралығында тұрмыстық зорлық-зомбылықтың алдын алуға, әйелдер мен балалардың құқықтарын қорғауға бағытталған "Қауіпсіз үй" жедел-профилактикалық іс-шарасы өтуде.
Үш күнге жоспарланған шара барысында полиция қызметкерлері отбасылық жанжалға бейім азаматтарды, сондай-ақ көмекке мұқтаж отбасыларды анықтап, олардың жағдайын зерделейді. Тұрмыстық жанжалдардың алдын алу, зорлық-зомбылыққа жол бермеу және отбасы мүшелерінің қауіпсіздігін қамтамасыз етуге ерекше назар аударылады.
Жыл басынан бері облыс аумағында отбасы-тұрмыстық қатынастар саласында болған құқық бұзушылықтар туралы 4158 хабарлама қаралды. Отбасындағы тыныштықты бұзған 4 мыңнан астам тұлға Қазақстан Республикасының Әкімшілік құқық бұзушылық туралы кодексінің 73-бабы бойынша әкімшілік жауапкершілікке тартылды.
Сонымен қатар отбасы-тұрмыстық саладағы құқық бұзушыларға қатысты 3310 қорғау нұсқамасы шығарылды. Бұл құжаттар арқылы құқық бұзушылардың жәбірленушілерге қатысты әрекеттеріне заңда белгіленген шектеулер қойылады.
Полиция қызметкерлері отбасындағы жанжалға немқұрайлы қарамауға шақырады. Зорлық-зомбылыққа тап болған немесе мұндай жағдайдың куәсі болған жағдайда, дереу 102, 111 немесе 98-10-99 нөмірлеріне хабарласуға болады.
Отбасындағы қауіпсіздік – әр адамның құқығы мен өміріне деген құрметтен басталады.
