Павлодар қаласы Полиция басқармасы Солтүстік полиция бөлімінің қызметкерлері интернет және телефон алаяқтығының алдын алуға бағытталған профилактикалық жұмыстарды жүргізуде.
Полицейлер тұрғындармен кездесіп, ақпараттық жадынамалар мен брошюралар таратады, сондай-ақ көпқабатты тұрғын үйлердің кіреберістерінде және қоғамдық орындарда профилактикалық материалдар орналастырады. Негізгі мақсат – азаматтарға алаяқтықтың кең таралған тәсілдері туралы түсіндіру және цифрлық қауіпсіздіктің қарапайым ережелерін еске салу.
Кездесулер барысында полиция қызметкерлері алаяқтардың өздерін банк, құқық қорғау органдарының, қауіпсіздік қызметтерінің және басқа да ұйымдардың қызметкерлері ретінде таныстыратынына назар аударады. Әртүрлі сылтаулармен олар азаматтардың жеке және банктік деректеріне қол жеткізуге тырысып, психологиялық қысым көрсетеді және шешімді мүмкіндігінше тез қабылдауды талап етеді.
Полицейлер ескертеді: банк және мемлекеттік орган қызметкерлері телефон арқылы парольдерді, SMS арқылы келген кодтарды, банк карталарының деректерін хабарлауды немесе ақшаны «қауіпсіз шоттарға» аударуды талап етпейді.
Күдікті қоңырау түскен жағдайда әңгімені дереу тоқтатып, ұйыммен оның ресми байланыс нөмірі арқылы өзіңіз хабарласу қажет. Егер сіз алаяқтардың құрбаны болсаңыз немесе алаяқтық әрекетке күмәндансаңыз, дереу полицияға 102 нөмірі арқылы хабарласыңыз.
