«Жалпы білім беретін мектептердегі білім алушылар мен тәрбиеленушілердің жекелеген санаттарына тегін және жеңілдікпен тамақтандыруды ұсыну» мемлекеттік қызметін көрсету жөніндегі пилоттық жобаны іске асыру туралы

Сноска. Вводится в действие по истечении десяти календарных дней после дня его первого официального опубликования и действует в течение 12 (двенадцати) месяцев в соответствии с пунктом 7 настоящего совместного приказа.

«Мемлекеттік көрсетілетін қызметтер туралы» Қазақстан Республикасы Заңының 22-бабына сәйкес, сондай-ақ Қазақстан Республикасы Президентінің 2022 жылғы 13 қыркүйектегі № 1008 Жарлығымен бекітілген Мемлекет басшысының 2022 жылғы 1 қыркүйектегі «Әділетті мемлекет. Біртұтас ұлт. Берекелі қоғам» атты Қазақстан халқына Жолдауын іске асыру жөніндегі жалпыұлттық іс-шаралар жоспарының 67-тармағын, Қазақстан Республикасы Президентінің 2022 жылғы 26 қарашадағы № 2 Жарлығымен бекітілген Қазақстан Республикасы Президентінің «Әділетті Қазақстан: бәріміз және әрқайсымыз үшін. Қазір және әрдайым» сайлауалды бағдарламасын іске асыру жөніндегі іс-қимыл жоспарының 82-тармағын орындау үшін БҰЙЫРАМЫЗ:

1. «Әлеуметтік әмиян» арқылы мемлекеттік қолдаудың монетарлық емес шаралары режимінде «Жалпы білім беретін мектептердегі білім алушылар мен тәрбиеленушілердің жекелеген санаттарына тегін және жеңілдікпен тамақтандыруды ұсыну» мемлекеттік қызметін көрсету жөніндегі пилоттық жоба (бұдан әрі – пилоттық жоба) іске қосылсын.

2. Пилоттық жобаны іске асыру алгоритмі осы бірлескен бұйрыққа 1-қосымшаға сәйкес бекітілсін.

3. Осы бірлескен бұйрыққа 2-қосымшаға сәйкес пилоттық жобаға қатысатын білім беру ұйымдарының тізімі бекітілсін.

4. Қазақстан Республикасы Оқу-ағарту министрлігінің Цифрландыру және мемлекеттік қызметтерді автоматтандыру департаменті, Балалардың құқықтарын қорғау комитеті, Қазақстан Республикасы Жасанды интеллект және цифрлық даму министрлігінің Мемлекеттік көрсетілетін қызметтер комитеті, «Ұлттық ақпараттық технологиялар» акционерлік қоғамы, «Ахмет Байтұрсынұлы атындағы «Талдау» ұлттық зерттеулер және білімді бағалау орталығы» акционерлік қоғамы, облыстардың, республикалық маңызы бар қалалардың және астананың жергілікті атқарушы органдары пилоттық жобаны іске асыруды қамтамасыз етсін.

5. Қазақстан Республикасы Оқу-ағарту министрлігінің Цифрландыру және мемлекеттік қызметтерді автоматтандыру департаменті:

1) осы бірлескен бұйрыққа мемлекеттік органдар басшыларының соңғысы қол қойған күннен бастап күнтізбелік бес күн ішінде оны ресми жариялау және Қазақстан Республикасы нормативтік құқықтық актілерінің эталондық бақылау банкіне енгізу үшін «Қазақстан Республикасының Заңнама және құқықтық ақпарат институты» шаруашылық жүргізу құқығындағы республикалық мемлекеттік кәсіпорнына электрондық нысанда қазақ және орыс тілдерінде жолдауды;

2) осы бұйрықты Қазақстан Республикасы Оқу-ағарту министрлігінің интернет-ресурсында орналастыруды қамтамасыз етсін.

6. Осы бірлескен бұйрықтың орындалуын бақылау жетекшілік ететін Қазақстан Республикасының Оқу-ағарту вице-министрі мен Жасанды интеллект және цифрлық даму вице-министріне жүктелсін.

7. Осы бірлескен бұйрық алғашқы ресми жарияланған күнінен кейін күнтізбелік он күн өткен соң күшіне енеді және 12 (он екі) ай ішінде қолданыста болады.

Қазақстан Республикасының Оқу-ағарту министрінің міндетін атқарушы

_____________Ж. Шарабасов

Қазақстан Республикасының Жасанды интеллект және цифрлық даму министрінің міндетін атқарушы

______________Р. Коняшкин

Қазақстан Республикасы

Оқу-ағарту министрінің м.а.

2026 жылғы «15» қаңтардағы

№ 18-НҚ

және

Қазақстан Республикасының

Жасанды интеллект және

цифрлық даму министрінің м.а.

2026 жылғы «19» қаңтардағы

№ 23/НҚ бірлескен бұйрығына

1-қосымша

«Жалпы білім беретін мектептердегі білім алушылар мен тәрбиеленушілердің жекелеген санаттарына тегін және жеңілдікпен тамақтандыруды ұсыну» мемлекеттік көрсетілетін қызмет жөніндегі пилоттық жобаны іске асыру алгоритмі

1. Осы «Жалпы білім беретін мектептердегі білім алушылар мен тәрбиеленушілердің жекелеген санаттарына тегін және жеңілдікпен тамақтандыруды ұсыну» мемлекеттік көрсетілетін қызмет жөніндегі пилоттық жобаны іске асыру алгоритмі (бұдан әрі – Алгоритм) «Жалпы білім беретін мектептердегі білім алушылар мен тәрбиеленушілердің жекелеген санаттарына тегін және жеңілдікпен тамақтандыруды ұсыну» мемлекеттік көрсетілетін қызмет (бұдан әрі - Қызмет) жөніндегі пилоттық жобаны іске асыру кезінде мемлекеттік органдар мен ұйымдардың өзара іс-қимылын халықты мемлекеттік қолдаудың монетарлық емес шаралары режимінде «Әлеуметтік әмиян» арқылы жүзеге асырылады.

2. Осы Алгоритмде мынадай негізгі ұғымдар мен қысқартулар қолданылады:

1) әлеуметтік әмиян – жеке тұлғаларды мемлекеттік қолдау шаралары туралы хабарлауға (хабархат), есепке алуға және алуға (көрсетуге) арналған ақпараттандыру объектісі;

2) бизнес-әмиян – мемлекеттік қолдаудың монетарлық емес шаралары шеңберінде міндеттерді шешуге арналған ақпараттандыру объектісі.;

3) аппараттық-бағдарламалық кешен (бұдан әрі - АБК) - белгілі бір үлгідегі міндеттерді шешу үшін бірлесіп қолданылатын бағдарламалық қамтамасыз ету мен техникалық құралдардың жиынтығы;

4) көрсетілетін қызметті беруші – білім беру ұйымдары;

5) көрсетілетін қызметті алушы – жеке тұлғалар (ата-ана немесе оны алмастыратын адам, не кәмелеттік жасқа толған білім алушы немесе балалардың құқықтарын қорғау функцияларын жүзеге асыратын ұйымның басшысы);

6) цифрлық ваучер – азаматтың әлеуметтік әмиянында мемлекеттік әлеуметтік қолдаудың монетарлық емес шараларын алу құралы;

7) мемлекеттік қолдаудың монетарлық емес шаралары – мемлекет жеке тұлғаларға (отбасыларға) ақшалай баламасы жоқ тауарлар немесе көрсетілетін қызметтер түрінде беретін көмек;

8) «eGov mobile» мобильді қосымшасы (бұдан әрі – eGov mobile) мемлекеттік қызметтер мен «Электрондық үкімет» сервистерін мобильді байланыс құрылғылары арқылы көрсету үшін арналған өнім;

9) қысқа мәтіндік хабарлама (бұдан әрі – SMS-хабарлама) – оператордың ұялы байланыс желісі мен абоненттік құрылғысының техникалық мүмкіндіктеріне сәйкес келетін көлемде, белгілі бір ретпен терілген әріптер мен (немесе) сандар мен (немесе) таңбалардан тұратын ақпараттық хабарлама;

10) «Ұлттық білім беру дерекқоры» ақпараттық жүйесі (бұдан әрі – ҰБДҚ) білім беру саласындағы әкімшілік және өзге де деректерді жинауға, өңдеуге және талдауға, сондай-ақ басқа ақпараттандыру объектілерімен ақпараттық өзара іс-қимыл жасауды қамтамасыз етуге арналған ақпараттық жүйе;

11) «Smart Data Ukimet» ақпараттық-талдамалық жүйесі (бұдан әрі – SDU) – мемлекеттік органдардың ақпараттық жүйелерінде жинақталатын деректерді жинау, сақтау және кешенді талдау жүйесі, ол мемлекеттік органдарға деректер негізінде тиімді басқарушылық шешімдер қабылдауға арналған талдамалық платформаны ұсынады;

12) «электрондық үкіметтің» веб-порталы (бұдан әрі – ЭҮП) – барлық жинақталған үкіметтік ақпаратқа, оның ішінде нормативтік-құқықтық базаға, сондай-ақ мемлекеттік қызметтерге, табиғи монополия субъектілерінің желілеріне қосылу үшін техникалық шарттарды беру қызметтеріне және электронды түрде көрсетілетін мемлекетке қатысы бар сектор субъектілерінің қызметтеріне бірыңғай қолжетімділік ұсынатын ақпараттық жүйе;

13) «e-Otinish» ақпараттық жүйесі (бұдан әрі – e-Otinish) – азаматтардың өтініштерін қабылдау және өңдеу үшін арналған бірегей платформа;

14) QR (кюар) коды - матрицалық штрихкодтардың немесе екі өлшемді штрихкодтардың түрі;

15) тапсырыс беруші – конкурс ұйымдастырушы (білім беру ұйымы);

16) өнім беруші – кәсіпкерлік қызметті жүзеге асыратын, қызмет көрсетуге немесе тауар жеткізуге шарт жасасқан жеке тұлға, заңды тұлға (мемлекеттік мекемелерді қоспағанда).

1-тарау. Мемлекеттік органдар мен білім беру ұйымдарының пилоттық жобаны іске асыру кезіндегі өзара іс-қимыл тәртібі

3. Әлеуметтік әмиян арқылы мемлекеттік қолдаудың монетарлық емес шаралары режимінде қызмет көрсету жөніндегі пилоттық жоба «Отбасы және балалар саласында мемлекеттік қызметтер көрсету қағидаларын бекіту туралы» Қазақстан Республикасы Білім және ғылым министрінің бұйрығымен 2020 жылғы 24 сәуірдегі № 158 бекітілген «Жалпы білім беретін мектептердегі білім алушылар мен тәрбиеленушілердің жекелеген санаттарын тегін және жеңілдікпен тамақтандыруды ұсыну» мемлекеттік қызмет көрсету қағидаларына (нормативтік құқықтық актілерді мемлекеттік тіркеу тізілімінде № 20478 тіркелген), сондай-ақ Қазақстан Республикасы Білім және ғылым министрінің 2018 жылғы 31 қазандағы № 598 бұйрығымен бекітілген Мемлекеттік орта, техникалық және кәсіптік, орта білімнен кейінгі білім беру ұйымдарында, қосымша білім беретін мектептен тыс ұйымдарда білім алушыларды тамақтандыруды ұйымдастыру, сондай-ақ мемлекеттік мектепке дейінгі ұйымдарда, жетім балалар мен ата-анасының қамқорлығынсыз қалған балаларға арналған білім беру ұйымдарында тәрбиеленетін және білім алатын балаларды тамақтандыруды қамтамасыз етуге байланысты тауарларды сатып алу қағидаларына (Нормативтік құқықтық актілерді мемлекеттік тіркеу тізілімінде № 17948 тіркелген) және осы бірлескен бұйрыққа сәйкес жүзеге асырылады.

4. Тегін және жеңілдетілген тамақпен қамтамасыз ету туралы хабарлама (ескерту), цифрлық ваучерлерді қалыптастыру және іске қосу, сондай-ақ көрсетілген қызметтер үшін төлемдер әлеуметтік әмиян арқылы жүзеге асырылады. Тегін тамақ алатын білім алушыларды есепке алу және тіркеу АБК және бизнес-әмиянды пайдалана отырып жүзеге асырылады. Барлық көрсетілген ақпараттандыру объектілері интеграцияланған режимде жұмыс істейді.

5. Білім беру ұйымының «Әлеуметтік педагог» рөлі берілген қызметкері ай сайын ҰБДҚ-да Қазақстан Республикасы Үкіметінің 2008 жылғы 25 қаңтардағы № 64 қаулысымен бекітілген қағидаларына сәйкес білім беру ұйымдарының мемлекеттік атаулы әлеуметтік көмек алуға құқығы бар отбасылардан, сондай-ақ мемлекеттік атаулы әлеуметтік көмек алмайтын, жан басына шаққандағы табысы ең төменгі күнкөріс деңгейінің шамасынан төмен отбасылардан шыққан білім алушылары мен тәрбиеленушілеріне және жетім балаларға, ата-анасының қамқорлығынсыз қалып, отбасыларда тұратын балаларға, төтенше жағдайлардың салдарынан шұғыл жәрдемді талап ететін отбасылардан шыққан балаларға және өзге де санаттағы білім алушылар мен тәрбиеленушілерге қаржылай және материалдық көмек көрсетуге арналған қаражатты қалыптастыру, бағыттау және бөлу негізінде жүргізіледі.

Қалыптастырылған тізім білім беру ұйымының бірінші басшысының шешімімен бекітіледі және деректердің сәйкестігін тексеру үшін SDU-ке жіберіледі, тексеру нәтижелері бойынша білім алушылардың тізімі ЭҮП-ке беріледі.

Бастауыш сынып білім алушыларының тізімі SMS-хабарламалар жіберілмей, ЭҮП-дан әлеуметтік әмиянға жіберіледі.

Көрсетілетін қызметті алушы SMS-хабарламада көрсетілген сілтеме арқылы өтіп немесе App Store (Апп Стор) не Play Market (Плей Маркет) қосымшалар дүкенінен eGov Mobile қолданбасын өз бетінше жүктеп, жүйеге кіріп, «Әлеуметтік әмиян» белгішесін таңдайды.

ЭҮП-нан келіп түсетін көрсетілетін қызмет алушылардың деректері негізінде әлеуметтік әмиянда көрсетілетін қызмет алушылар тарапынан белсендірілуге жататын цифрлық ваучерлер автоматты түрде қалыптастырылады.

SDU-де тексеруден өтпеген білім алушылардың тізімі ҰБДҚ-ға қайтарылады.

6. Динамикалық QR-кодты пайдалану үшін көрсетілетін қызмет алушы оны әлеуметтік әмиянда қалыптастырады және білім алушыға электрондық форматта береді. Көрсетілген динамикалық QR-код бизнес-әмиян арқылы сканерленеді. Интернет қосылымы болмаған жағдайда бизнес-әмиян тегін және жеңілдетілген тамақпен қамтамасыз ету фактісін есепке алу және тіркеу деректерін сақтау мен кейін оларды Әлеуметтік әмиянға беруді қамтамасыз етеді.

7. Білім басқармалары, білім беру ұйымдары білім алушылар мен тәрбиеленушілердің тегін және жеңілдетілген тамақпен қамтылуын есепке алуды және тіркеуді Қазақстан Республикасы Оқу-ағарту министрінің 2022 жылғы 14 қарашадағы № 456 бұйрығымен бекітілген Білім беру саласындағы ақпараттандыру объектілеріне қойылатын ең төменгі талаптарына (нормативтік құқықтық актілерді мемлекеттік тіркеу тізілімінде № 30534 болып тіркелген) сәйкес АБК арқылы жүзеге асырады.

Персонал мен білім алушылар, тәрбиеленушілер 700 адамға дейін болатын білім беру ұйымдарындағы оқушыларды есепке алу және тіркеу бизнес-әмиян арқылы жүзеге асырылады.

Цифрлық ваучер құрылған білім алушылар мен тәрбиеленушілердің деректері 1 (бір) жұмыс күні ішінде АБК және бизнес-әмиянға енгізіледі.

Ақпараттық жүйенің тұрақты жұмысын қамтамасыз ету және мүмкін болатын ақауларға жедел әрекет ету үшін АБК пайдаланылатын елді мекенде сүйемелдейтін ұйымның өкілінің жұмысы ұйымдастырылады.

8. АБК мен бизнес-әмиян есепке алу және тіркеу деректері туралы ақпаратты Әлеуметтік әмиянға интеграция арқылы жібереді.

9. Берілген цифрлық ваучер әрбір оқушы мен тәрбиеленушіге бір оқу жылы мерзімінде қолдануға беріледі.

10. Егер Әлеуметтік әмиянда цифрлық ваучерді белсендіру мүмкіндігі жоқ болса, көрсетілетін қызметті алушы білім беру ұйымына жүгінеді. Көрсетілетін қызмет алушының өтініші осы Алгоритмге 1-қосымшасы нда көрсетілген нысан бойынша ұйым басшысына жолданады да тегін және жеңілдетілген тамақпен қамтамасыз ету үшін ұсынылады.

Келіп түскен өтініштер негізінде «Әлеуметтік педагог» осы Алгоритмнің 5тармағына сәйкес білім алушылар тізімін қалыптастырады. Білім беру ұйымының басшысы тізімді бекітуден кейін ҰБДҚ-да көрсетілген білім алушыларға цифрлық ваучерлер жасалады.

11. «Жалпы білім беретін мектептердегі білім алушылар мен тәрбиеленушілердің жекелеген санаттарын тегін және жеңілдікпен тамақтандыруды ұсыну» мемлекеттік қызмет көрсету жөніндегі пилоттық жобаны жүргізу кезеңінде көрсетілетін қызметті алушы көрсетілетін қызметтің сапасын «e-Otinish» ақпараттық жүйесі арқылы бағалауға құқылы.

12. Әлеуметтік әмияннан ҰБДҚ-ға күн сайын цифрлық ваучерлердің белсендірілуі және қызмет көрсету туралы есеп беріледі.

13. Есепті кезеңнен кейінгі айдың 5-не дейінгі мерзімде «Әлеуметтік педагог» осы Алгоритмнің 2-қосымшасы на сәйкес тегін және жеңілдікпен тамақ алған оқушылар туралы деректері көрсетілген, Әлеуметтік әмияннан табель шығарады. Тегін және жеңілдікпен тамақтану үшін төлем тапсырыс беруші тарапынан «Әлеуметтік әмияндағы» табель деректеріне сәйкес, тегін және жеңілдікпен тамақтанған оқушылар саны бойынша жүзеге асырылады.

Табель нысаны осы Алгоритмге 2-қосымша ретінде бекітіледі. Мектеп әкімшілігі табельдің қағаз түрін сақталуын қамтамасыз етеді.

14. Мемлекеттік органдар мен ақпараттандыру объектілерінің қызмет көрсету барысында ақпараттық жүйелердің үздіксіз және дұрыс жұмыс істеуін қамтамасыз ету мақсатында өзара іс-қимылы тұрақты негізде жүзеге асырылады.

«Жалпы білім беретін мектептердегі білім алушылар мен тәрбиеленушілердің жекелеген санаттарына тегін және жеңілдікпен тамақтандыруды ұсыну» мемлекеттік қызметін көрсету жөніндегі пилоттық жобаны іске асыру алгоритміне

1-қосымша

_______________________

_____________ басшысына

азамат(ша)тан __________

(тегі, аты, әкесінің аты

(бар болған жағдайда))

және өтініш берушінің жеке

сәйкестендіру нөмірі (ЖСН),

тұратын мекенжайы: ______

_________________________

(елді мекен атауы,тұрғылықты

мекенжайы, телефон нөмірі)

Өтініш

Сізден ____________________ (тегі, аты, әкесінің аты (бар болған жағдайда),

_________________ жеке сәйкестендіру нөмірі, туған күні) ______________________

(мектеп № _____, сыныбы мен әрпі көрсетіледі) білім алатын, тегін және жеңілдікпен

тамақтандырумен қамтамасыз етілетін білім алушылар мен тәрбиеленушілер тізіміне

_________________ (оқу жылы көрсетіледі) оқу жылына енгізуіңізді сұраймын, себебі

_______________________________________________ (себептердің бірі көрсетіледі:

шетелдіктер мен азаматтығы жоқ адамдар, операциялық жүйе (Android/iOS)

базасында ұялы телефондардың болмауы, зейнеткерлік жасқа жетуі, тұрғылықты

жерінен тыс болуы, қызметті алуға келісім беру мүмкіндігінің болмауы және т. б.).

Қазақстан Республикасының «Жеке деректер және оларды қорғау туралы»

Заңымен қорғалатын, ақпараттық жүйелерде қамтылған деректерді пайдалануға

келісім беремін.

«___»____ ______20__жыл

азамат(ша)ның қолы

2-қосымша

Білім беру ұйымының білім алушылары мен тәрбиеленушілерін тегін ыстық тамақтандыруды есепке алу табелі ____________________________________ _ ден_____ кезең ішінде

№	Тегі, аты, әкесінің аты (болған жағдайда)	Күні

1
2
3
	Күні _________		қолтаңба _________________
			білім беру ұйымның басшысы